Ուսումնական տարին սկսվելուց առաջ մանկական հագուստի գներն աճել են 7 տոկոսով: Այս մասին օգոստոսի 16-ին՝ լրագրողների հետ հանդիպման ժամանակ ասաց Հայաստանի Սպառողների ասոցիացիայի նախագահ Արմեն Պողոսյանը՝ վկայակոչելով Ազգային վիճակագրական ծառայության տվյալները:
Միեւնույն ժամանակ նա նշեց, որ գրենական պիտույքների գնաճ չի գրանցվել: «Հագուստը թանկացել է: Սակայն չէ՞ որ, ասենք, ուսապայուսակներն առանց թանկանալու էլ չափազանց թանկ արժեին: Մի՞թե յուրաքանչյուր ծնող կարող է 15-20 հազար դրամ տրամադրել իր երեխայի համար ուսապայուսակ ձեռք բերելու համար: Ո՛չ: Ոչ բոլոր»,- դժգոհեց Պողոսյանը:
Փորձագետը նշեց, որ երեխային դպրոց գնալուն պատրաստելու նվազագույն ծախսերը, նրա համար դպրոցական համազգեստ, ուսապայուսակ եւ գրենական պիտույքներ ձեռք բերելով, կազմում է 40-50 հազար դրամ (մոտ 100 դոլար):
Արմեն Պողոսյանը չշրջանցեց նաեւ ծնողների օգտագործած դպրոցական արտադրանքի որակի հարցը: «Մեզ համար, որպես սպառողների, պակաս կարեւոր չէ նաեւ մեր ձեռք բերած արտադրանքի որակը: Մենք չէ որ նման պրակտիկա ունեինք, երբ մի կին ինձ էր դիմել եւ հայտարարել, որ օգոստոսի 30-ին 2 աշակերտի համար 2 պայուսակ է ձեռք բերել, իսկ սեպտեմբերի 1-ին երկուսն էլ պատռվել են»,- ասաց ՀԿ ղեկավարը:
Փորձագետը գնաճի հիմնական պատճառներից մեկն է համարում դպրոցներում միասնական համազգեստ կրելու Կրթության եւ գիտության նախարարության որոշումը: Պետությունը դպրոցներին չի տրամադրել այս համազգեստը ձեռք բերելու միջոցներ: Աշակերտների ծնողները այն պետք է իրենց հաշվին ձեռք բերեն: Արմեն Պողոսյանի խոսքով՝ սրանից որոշել են օգտվել աշակերտական համազգեստ արտադրողները եւ վաճառողները:
