Եվրասիական տնտեսական միության շրջանակում ամենեւին էլ պարտադիր չէ եվրասիական նմուշի վարորդական իրավունքներ ստանալը։ Այս մասին օգոստոսի 16-ին լրագրողների հետ հանդիպման ժամանակ հայտարարեց «Այլընտրանք» հետազոտական կենտրոնի ղեկավար, տնտեսագիտական գիտությունների դոկտոր Թաթուլ Մանասերյանը՝ Աստանա-Բիշքեկ-Երեւան-Մինսկ հեռուստակամուրջի ընթացքում՝ «Համագործակցություն Եվրասիական տնտեսական միության շրջանակում. Ղազախստանում կայացած ԵՏՄ-ի միջկառավարական խորհրդի նիստի արդյունքները» թեմայով։
Նրա խոսքով՝ Հայաստանի վարորդներին տրվող վարորդական իրավունքները, առավել եւս այն վարորդներին, որոնք աշխատում են բեռնատար տրանսպորտի ոլորտում, պետք է ընդուն են ԵՏՄ-ի բոլոր երկրները՝ եւ Ռուսաստանը եւ Ղրղզստանը, եւ Բելառուսը, եւ Ղազախստանը։
«Հիշեցնենք, որ նման փորձ է կուտակվել նաեւ ազատ առեւտրի հյուսիսամերիկյան բլոկում եւ Եվրամիությունում։ Այնպես որ այնքան էլ պարտադիր չէ Եվրասիական նմուշի վարորդական իրավունք ստանալը»,-կարծում է Մանասերյանը։
Հիշեցնենք, որ օգոստոսի14-ին Աստանայում կայացած Եվրասիական միջկառավարական խորհրդի նիստում ԵՏՄ երկրներից մեկում տրված ազգային ու միջազգային վարորդական իրավունքներն ընդունելու հանձնարարական է ստորագրվել՝ Միության մյուս անդամ երկրում ձեռնարկատիրական գործունեություն ծավալելու համար։
