Իսպանիայի լողափին դելֆինի ձագ է զոհվել, երբ զբոսաշրջիկները սկսել են նրա հետ սելֆի անել։ Այս մասին Facebook-ում հայտնել է Equinac կամակերպությունը, որը զբաղվում է ծովային կենդանիների պաշտպանությամբ։
Կազմակերպության տվյալներով՝ միջադեպը տեղի է ունեցել ուրբաթ՝ օգոստոսի 11-ին, Անդալուսիայի Մոխակար նավահանգստում։ Մորը կորցրած փոքրիկ դելֆինը հայտնվել էր լողափի ծանծաղուտում։
Հանգստացողները կենդանուն դուրս են բերել ջրից եւ սկսել են լուսանկարվել նրա հետ, շոյել նրան։ Շուրջ 15 րոպե անց լողափին են հայտնվել Equinac-ի փրկարարները, սակայն դելֆինն արդեն մահացել էր։
Փորձագետների խոսքով՝ կենդանին տանջված էր եւ ուժեղ սթրես էր վերապրել՝ հայտնվելով մարդկանց ձեռքում։ Ցնցումը բացասաբար է ազդել սիրտ-անոթային եւ շնչառական համակարգերի վրա, ինչն էլ հանգեցրել է կաթնասունի մահվանը։