Մեզ անհրաժեշտ է եւ հրդեհաշիջող ավիացիա, եւ դժվարամատչելի ռելիեֆի պայմաններում աշխատող հրշեջ ամենագնացներ: Այս մասին, այսօր՝ օգոստոսի 17-ին, կառավարության նիստից հետո լրագրողների հետ զրույցում նշել է ՀՀ արտակարգ իրավիճակների փոխնախարար Դավիթ Կարապետյանը:
Նրա խոսքով, օգոստոսի 10-ին Վայոց ձորի մարզի Արտավան համայնքի տարածքում բռնկված հրդեհի մարման աշխատանքներն ամբողջովին ավարտվել են. «Վայոց ձորում այրվել է 15 կմ պարագծով խոտածածկ տարածք, որից 320 հա-ն՝ անտառածածկ: Փորվել են բազմաշերտ խրամատներ հրդեհի տարածումը կանխելու նպատակով: Խոսրովի անտառ պետական արգելոցի տարածքում բռնկված հրդեհը մարվել է օգոստոսի 16-ին: Նախնական տվյալներով Խոսրովի պետական արգելոցի տարածքում այրվել է 16 կմ պարագծով բուսածածկ տարածք, որից 360 հա-ն՝ անտառներ»:
Կարապետյանը նշեց, որ քանի որ Հայաստանում շատ երկար ժամանակ չէին եղել նման մասշտաբի հրդեհներ, եւ մեր հասարակությունը լավ չէր պատկերացնում դրանց մարման դժվարությունները, առաջացել էին հանրային սպասումներ, որ այսպիսի հրդեհները եւս կարելի է մարել շատ արագ. «Այս կարգի հրդեհների դեմ անգամ աշխարհի ամենահզոր երկրները դժվարություններ են ունենում:
Մենք ունենք տեխնիկա, բայց դա բավարար չէ: Տեխնիկան ձեռք է բերվել նախարարության ունեցած հնարավորությունների սահմաններում: Հրդեհաշիջող օդանավ չունենալու հարցը կապված է ֆինանսի հետ: Ժխտել, որ ԱԻՆ-ը վերջին տարիներին իր աշխատանքով մեծ առաջընթաց է ունեցել, եւս սուբյեկտիվ է»:
Փոխնախարարը խոստովանեց, որ ԱԻՆ-ը տեխնիկապես խնդիրներ ուներ, բայց հավելեց, որ իրենք փորձել են փոխհատուցել կազմակերպված աշխատանքով:
Անդրադառնալով պատասխանատվության խնդրին, նա ասաց. «Եթե լինեին ֆինանսական միջոցներ եւ տեխնիկական միջոցները ստեղծված չլինեին, կարելի կլիներ խոսել պատասխանատվության մասին, բայց մենք մեր ռեսուրսներով մենք առավելագույնն արել ենք ու անում ենք: Ամսի 12-ին հրդեհի ծավալները բավական փոքր էին եւ հույս կար, որ այն հնարավոր է չեզոքացնել սեփական միջոցներով, բայց քամին արագացրեց հրդեհի տարածումը: Իրավիճակը սեփական ուժերով կարգավորելու համար դարձավ անհնարին եւ մենք օգոստոսի 14-ի առավոտյան պաշտոնապես դիմեցինք մեր գործընկերներին եւ նույն օրը Ռուսաստանի ԱԻՆ-ի օդանավը Հայաստանում էր»:
Դավիթ Կարապետյանը նշեց, որ Հայաստանին այս պահին անհրաժեշտ է եւ հրդեհաշիջող ավիացիա, եւ դժվարամատչելի ռելիեֆի պայմաններում աշխատող հրշեջ ամենագնացներ, որոնց ուղղությամբ աշխատանքներ տարվում են:
