«Արմենիա» բժշկական կենտրոնի բժիշկ Արտակ Օհանյանի կողմից անզգուշությամբ հիվանդին մահ պատճառելու գործով հերթական նիստն օգոստոսի 17-ին կրկին հետաձգվեց:
Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում նիստը հետաձգվեց, քանի որ ամբաստանյալի պաշտպանը ներկա չէր: Հաջորդ նիստը նշանակվեց սեպտեմբերի 7-ին:
Նշենք, որ ըստ մեղադրական եզրակացության՝ ԲԿ-ի թունավորումների բաժանմունքի բժիշկ-տոքսիկոլոգ Արտակ Օհանյանը չի իրականացրել Ապարանի բժշկական կենտրոնից իրենց մոտ ստացիոնար բուժօգնության ընդունված Գրիշա Հովհաննիսյանի շարունակական ստացիոնար դինամիկ հսկողություն եւ նպատակաուղղված բուժում, ինչի հետեւանքով անզգուշությամբ առաջացրել է Գրիշա Հովհաննիսյանի մահը:
Դեպքը տեղի է ունեցել մի քանի տարի առաջ: Ըստ տարբեր տեղեկությունների, հիվանդը հրաժարվել է ստացիոնար բուժումից եւ հեռացել հիվանդանոցից: Ավելի ուշ, նա մահացել է: Մահացածի հարազատները որեւէ բողոք չունեն, Արտակ Օհանյանը եւս իրեն առաջադրված մեղադրանքը չի ընդունում:
