Իսրայելն Ադրբեջանին զենք վաճառող միակ երկիրը չէ, եւ դա ամենասարսափելին չէ։ Այս մասին հայտարարել է ՀՀՇ-ի անդամ Հովհաննես Իգիթյանը՝ օգոստոսի 17-ին, մամուլի ասուլիսի ժամանակ։
Անդրադառնալով իսրայելական մամուլի հրապարակումներին, ըստ որի, իսրայելական դրոններ արտադրող ընկերությունն այն փորձարկել է հայկական դիրքերի ուղղությամբ, Իգիթյանն ասաց, որ Իսրայելի պաշտպանության նախարարությունը ուսումնասիրում է այդ միջադեպը, քանի որ իրենց օրենդրությունն արգելում է որեւէ հակամարտության անմիջական մասնակցություն ունենալ:
Նրա խոսքով՝ Հայաստանի դիվանագիտական գերատեսչությունը պետք է իր բացասական վերաբերմունքը ցույց տա իսրայելական կողմին։ Այսինքն՝ խոսքն իսրայելական ընկերության բարեկամական բնույթ չկրող քայլի մասին է, հստակեցրեց Իգիթյանը։
Բացի այդ՝ 2008 թվականից Իսրայելի եւ Ադրբեջանի համագործակցությունն Իգիթյանը կապեց Հայաստանում 2016-ի ապրիլյան ողբերգաման իրադարձությունների հետ: Նրա կարծիքով՝ Բաքուն օգտվել է Հայաստանի «ոչ ժողովրդավար» լինելու հանգամանքից: Այդ կապակցությամբ տեղին է նկատել, որ հենց Երեւանն է հրաժարվել Իսրայելից զենք գնել։
Իգիթյանը նշեց, որ Հայաստանը ժամանակին մեծ սխալ է գործել՝ Իսրայելում դեսպանատուն չբացելով եւ չստեղծելով պայմաններ, որ Իսրայելի դեսպանատուն բացվի Երեւանում. «Հարաբերությունները չեն ավարտվում Ցեղասպանության ճանաչմամբ, անհրաժեշտ է աշխատել այդ երկրի հետ»,-ասաց նա՝ հավելելով, որ Իսրայելին եւս ձեռնտու է, որ ի դեմս Հայաստանի ունենալ դաշնակից պետություն:
