Իրաքում բնակվող եզդիները խնդրում են ինքնավարություն ստեղծել։ Այս մասին հայտարարել է Հայաստանի եւ աշխարհի եզդիների միության նախագահ Ազիզ Թամոյանը, օգոստոսի 17-ին կայացած մամուլի ասուլիսի ժամանակ։

Միության նախագահը հիշեցրեց, որ եզդի ժողովուրդը 7-րդ դարից մինչ այսօր 74 ցեղասպանություն է վերապրել։ «Դա մահեմդական ժողովուրդների ձեռքի գործն է։ Նմանատիպ վերաբերմունք են նրանք դրսեւորել նաեւ քրիստոնյա ժողովուրդների նկատմամբ։ Հայոց ցեղասպանության ընթացքում հազարավոր եզդիներ են սպանվել։ Որքա՞ն դա կարող է շարունակվել»,-հարցադրում արեց Թամոյանը։

Նա հիշեցրեց, որ սեպտեմբերին իրաքյան քրդերը մտադիր են անկախության հանրաքվե անցկացնել։ «Իրաքի իշխանությունները պատրաստ են ինքնավարություն ստեղծել քրիստոնյա ժողովուրդների եւ եզդիների համար։ Բայց քրդերը խանգարում են։ Նրանք սեպտեմբերին մտադիր են հանրաքվե անցկացնել։ Դա նրանց իրավունքն է։ Բայց թող ոտնձգություններ չկատարեն Եզդիստանի նկատմամբ»,-հայտարարեց Թամոյանը՝ համաշխարհային հանրությանը կոչ անելով եզդիների ցեղասպանություն թույլ չտալ։ «Եթե Բարզանին հասնի անկախության, նա անպայման ոտնձգություն կկատարի եզդիների նկատմամբ»,-ընդգծեց Թամոյանը՝ հավելելով, որ եզդիներն ապրում են իրենց պատմական երկրում, այնտեղ եզդիների մշակույթի հուշարձաններն են։

Հիշեցնենք, որ Իրաքում շրջանը, որտեղ բնակվում են եզդիները, 2014 թվականից «Իսլամական պետության» վերահսկողության ներքո է։