«Ես պաշտոնապես չեմ լսել եւ չեմ կարդացել, որ «Ելք» դաշինքը պատրաստ է ներկայացնել օրենսդրական նախաձեռնություն Եվրասիական տնտեսական միությունից դուրս գալու մասին»։ Այդ մասին այսօր՝ օգոստոսի 17-ին ՀՀԿ ԳՄ նիստից հետո լրագրողների հետ զրույցում ասել է ՀՀԿ մամուլի խոսնակ, ԱԺ փոխնախագահ Էդուարդ Շարմազանովը։
Նրա խոսքով, առնվազն «Ելք» դաշինքից մեկ կուսակցություն կա, որը ոչ նախընտրական փուլում, ոչ այժմ պաշտոնական կարծիք չի հայտնել այդ կապակցությամբ։ «Եթե «Հանրապետություն» կուսակցությունն ու «Լուսավոր Հայաստանը» առնվազն իրենց առաջնորդների եւ ակտիվիստների մակարդակով հայտնել են իրենց տեսակետը, ես «Քաղաքացիական պայմանագիր» կուսակցությունից մինչ այս պահը չեմ լսել հստակ դիրքորոշում՝ նրանք կողմ են, թե դեմ Եվրասիական միությանը»,- ասել է Շարմազանովը եւ հավելել. «Սա արհեստական օրակարգ է»։
Շարմազանովը հայտնել է, թե իրենք դեմ են նման նախաձեռնություններին։ «Մենք գտնում ենք, որ Հայաստանի անդամակցությունը ԵՏՄ-ին արդարացված է, արդյունավետ է։ Եթե մենք չմտնեինք ԵՏՄ, Հայաստանի լոլիկն ու վարունգը Փարիզում էին վաճառելո՞ւ»,- ասել է նա՝ չբացառելով, որ աշնանը կներկայացնեն ամբողջական ինֆորմացիա, թե մեզ ինչ է տվել ԵՏՄ-ն։