Հայաստանը անկախ պետություն է, որն ունի իր շահերը եւ սպասարկում է բացառապես իր շահերը։ Այդ մասին այսօր՝ օգոստոսի 17-ին ՀՀԿ ԳՄ նիստից հետո լրագրողների հետ զրույցում ասել է ՀՀԿ մամուլի խոսնակ, ԱԺ փոխնախագահ Էդուարդ Շարմազանովը՝ պատասխանելով Վրաստանում ՆԱՏՕ-ի զորավարժություններին ՀՀ զինուժի մասնակցության մասին հարցին։
«Նախ ՀՀ Զինված ուժերի մասնակցությունը Վրաստանում ՆԱՏՕ-ի զորավարժություններին շատ դրական եմ գնահատում։ Ոչ Ադրբեջանը, ոչ Թուրքիան չէին մասնակցում այդ զորավարժություններին, եւ միգուցե սա նաեւ խանդ է առաջացրել ադրբեջանցիների կողմից»,- ասել է նա, իսկ ՀՀ մասնակցությանը բացասաբար արձագանքով փորձագետներին շարմազանովը պատասխանել է. «Եթե նրանք մտահոգված են, որ ՀՀ զինված ուժերը մասնակցել են այդ զորավարժոթւյուններին, պետք է առաջին հերթին մտահոգվեն, որ ՆԱՏՕ-ի անդամ Թուրքիան աջակցում է Ադրբեջանին»։
«Այս զորավարժությունները բխում են մեր շահերից։ Այդ արձագանքողները հյուսիսում, արեւմուտքում եւ արեւելքում, թող ավելի լավ է մտածեն այն մասին, որ Թուրքիան երկու ձեռքով ու երկու ոտքով մխրճված է Ադրբեջանի զինուժի կազմավորման մեջ»,- նշել է Շարմազանովը։
«Մեր ռազմավարական գործընկերը Ռուսաստանն է, բայց մենք ունենք բազում ծրագրեր, որտեղ Հայաստանը համագործակցում է ՆԱՏՕ-ի հետ։ Հայաստանը անկախ պետություն է, որն ունի իր շահերը եւ սպասարկում է բացառապես իր շահերը»,- ասել է ՀՀԿ խոսնակը։
