Իրանը կողմ է ղարաբաղյան հարցի բացառապես քաղաքական կարգավորմանը, իսկ դա ազդակ է Ադրբեջանին։ Այս մասին օգոստոսի 17-ին լրագրողների հետ զրույցում ասել է ՀՀԿ փոխնախագահ, ՀՀԿ մամուլի քարտուղար Էդուարդ Շարմազանովը ՀՀԿ-ի գործադիր մարմնի նիստից հետո։
Հայաստանը, նրա խոսքով, մեծ կարեւորություն է հաղորդում Իրանի հետ հարաբերությունների զարգացմանը։ Ըստ Շարմազանովի, ՀՀԿ ԳՄ նիստում քննարկել են նաեւ Իրանի հետ հարաբերությունները։ «Մենք շատ ենք կարեւորում Հայաստանի հարաբերությունների զարգացումը Իրանի հետ։ Իրանը ունի հավասարակշռված մոտեցում ԼՂ կարգավորման ընթացքում։ Նախագահ Ռոհանին Սերժ Սարգսյանի հետ հանդիպմանը նշեց, որ Իրանը կողմնակից է բացառապես խնդրի քաղաքական կարգավորմանը։ Իսկ դա ազդակ է Ադրբեջանին, քանի որ Հայաստանն ու Արցախը երբեք չեն եղել խնդրի ռազմական լուծման ջատագովները»,- ասել է ՀՀԿ խոսնակը։