Լոս Անջելեսում մեքենայի հափշտակման մեջ կասկածվողը մահացել է ՝ ընկնելով կռունկից։ Մինչ այդ տղամարդուն մի քանի ժամ հետապնդում էր ոստիկանությունը։ Այս մասին գրում է Los Angeles Times-ը։
Հետապնդումը սկսվել է, երբ Subaru ամենագնացը ոստիկանության պահանջով կանգ չի առել Ուիլշիր պուրակի մոտ։ Հետագայում մեքենան նկատել են Լոնգ Բիչում։ Ոստիկանները մի քանի ժամ հետապնդել են վարորդին։
Հետո մեքենան նավահանգստի մոտ բախվել է արգելապատնեշին։ Այնտեղ տղամարդը մագլցել է կռունկը։ Ոստիկանների խոսքով՝ վերեւում նա իրեն տարօրինակ էր պահում ՝ ձեռքերն էր թափահարում ու հագուստը հանում։ Կռունկի մոտ հավաքվել էին հատուկ ջոկատայինները։ Նրանք փորձել են տղամարդուն համոզել, որ իջնի, բայց ապարդյուն։
Տղամարդը ընկել է 45 մ բարձրությունից ու մահացել։ Առայժմ ոստիկանությունը չգիտի՝ տղամարդը պատահաբար է ընկել, թե միտումնավոր է իրեն ցած նետել։