Իսպանացին, որը մահացել է Բարսելոնում ոստիկանների վրա ընթացած մեքենայում, նստած է եղել ուղեւորի նստատեղին եւ ոչ թե ուժայինների կողմից է գնդակահարվել, այլ սպանվել է անհայտ անձի կողմից, հայտնում է Vanguardia պարբերականը:
Ավելի վաղ հաղորդվել է, որ քաղաքի կենտրոնում ահաբեկչությունից հետո սպիտակ Ford Focus-ն ընթացել է ոստիկանների վրա, որի վարորդը սպանվել է փոխհրաձգության ժամանակ: Ավելի ուշ իշխանությունները հայտարարել են, որ սպանված իսպանացին ահաբեկչության հետ կապ չուներ:
Պարբերականի տեղեկություններով՝ տղամարդն իսկապես ավտոմեքենայի տերն էր, սակայն նրա մահվան հանգամանքները ոստիկաններին ստիպել են իրավիճակը նորովի գնահատել: Կատալոնիայի ներքին գործերի խորհրդական Խոակին Ֆորնը արդեն հայտարարել է այս միջադեպի եւ ահաբեկչության հնարավոր կապի մասին, որը առաջիկա ժամերին պետք է պարզեն քննիչները:
Հինգշաբթի Բարսելոնի տուրիստական կենտրոնում միկրոավտոբուսը մխրճվել է մարդկանց բազմության մեջ: Ոստիկանությունը միջադեպը ահաբեկչություն է համարել: Կատալոնիայի իշխանությունները հաստատել են, որ 13 մարդ զոհվել է, ավելի քան 100 մարդ վնասվածքներ է ստացել: Ահաբեկչության կազմակերպմանը մասնակցած 2 կասկածյալները կալանավորվել են, սակայն ամենագնացի վարորդն ազատության մեջ է: