Երկամսյա ժամկետում ՀՀ էներգետիկ ենթակառուցվածքների եւ բնական պաշարների նախարարությունը ՀՀ կառավարություն կներկայացնի ներդրումային ծրագրեր, որոնք կիրականացվեն Սեւանա լճից լրացուցիչ 100 միլիոն խմ ջրառի արդյունքում արտադրված էլեկտրաէներգիայի վաճառքից ստացված շահույթով: Այս կապակցությամբ ՀՀ կառավարությունն օգոստոսի 18-ին ընդունել է համապատասխան որոշում: Որոշմամբ հաստատվեց նաեւ այդ շահույթի հաշվարկման եւ վճարման կարգը, ինչպես նաեւ թույլատրվեց՝ Հայաստանի Հանրապետության էներգետիկ ենթակառուցվածքների եւ բնական պաշարների նախարարին՝ շահույթի վճարման համար անժամկետ արտաբյուջետային հաշիվ բացել ՀՀ ֆինանսների նախարարության գանձապետական ստորաբաժանումում:
Հիշեցնենք, որ 2017թ-ին Սեւանա լճից օրենքով սահմանված առավելագույնը 170 միլիոն խմ-ի փոխարեն իրականացվում է 270 միլիոն խմ ջրառ: Համապատասխան օրինագիծն ընդունվեց ՀՀ ԱԺ կողմից սույն թվականի հուլիսի 6-ին:
Սեւանից հավելյալ ջրառ իրականացնելու կառավարության որոշումը եւ դրան հետեւած օրենքում փոփոխությունները ծանր հարված հասցրին Սեւանա լճի էկոհամակարգին: Օգոստոսի 17-ի դրությամբ Սեւանից իրականացվել է 210.623 միլիոն խմ ջրառ, Սեւանա լճի մակարդակն իջել է 21 սմ-ով` կազմելով 1900.70մ: Լճի մակարդակը տարբերվում է նախորդ տարվա նույն օրվա մակարդակից ընդամենը 1 սմ-ով: Նման պայմաններում անհասկանելի է, թե արդյոք ՀՀ կառավարությունը Սեւանա լճի հաշվին ստացված շահույթը կուղղի լճի էկոհամակարգի վերականգնմանը: