Արտաքին շուկայում Հայաստանը չի կարող մրցակցել ձկան բարձր ինքնարժեքի պատճառով, ինչը պայմանավորված է ձկների համար նախատեսված կերի բարձր գներով։ Այս մասին օգստոստի 18-ին լրագրողների հետ հանդիպման ժամանակ ասաց Հայ ձկնարտադրողների եւ ձկնարտահանողների միության եւ «Հայ տնտեսվարող սուբյեկտների ու սպառողների իրավապաշտպանական կենտրոն» հասարակական կազմակերպության նախագահ Արթուր Աթոյանը։
Նրա խոսքով՝ Հայաստանում ձկնաբուծության ոլորտում ներկա իրավիճակը շատ անկայուն է։ «Ճգնաժամ է տիրում, եւ համապատասխան իրավասու մարմինը (Գյուղատնտեսության նախարարություն) անհրաժեշտ քայլեր չի ձեռնարկում։ Ոլորտը տեսադաշտից բաց է թողնված։ Բացակայում են ձկնաբուծության ոլորտի կայունացման մեխանիզմները»,-նշեց Աթոյանը։
Ըստ նրա՝ Հայաստանին էժան կեր է անհրաժեշտ՝ Թուրքիայի եւ Բաշկիրիայի հետ մրցակցել կարողանալու համար։ ՀԿ-ի ղեկավարը հայտարարեց, որ հանդես կգա Հայաստանում արտասահմանյան տեխնոլոգիաներ ներդնելու առաջարկով, որոնք կնպաստեն, որ տեղի արտադրությունը ձեռնտու լինի։ «Մենք կարող են դոնորներ գտնել, դա հնարավոր է»,-ընդգծեց նա։
