ՌԴ-ում վթարի գործով դատապարտված եւ վերջերս Հայաստան տեղափոխված Հրաչյա Հարությունյանն այսօր՝ օգոստոսի 18-ին, Էրեբունի եւ Նուբարաշեն վարչական շրջանների ընդհանուր իրավասության դատարանում հայտարարեց, որ իրեն մեղավոր է ճանաչում միայն ճանապարհային երթեւեկության կանոնները խախտելու մեջ:
«Ես կանոններն եմ խախտել, մնացածի մեջ ինձ մեղավոր չեմ ճանաչում»,-NEWS.am-ի հարցին ի պատասխան դատարանում ասաց Հրաչյա Հարությունյանը: Նա նշեց որ բանտային պայմանները շատ վատն են եղել, իսկ իրեն պատժախուց էին տեղափոխել իբր ճաշարան գնալուց հրաժարվելու համար:
«Բայց ես ճաշարան գնալուց չեմ հրաժարվել»,-ասաց նա:
Հրաչյա Հարությունյանը հայտնեց նաեւ, որ Հայաստանում արդեն սկսել է բուժումը:
Նշենք, որ դատարանում այսօր քննվում է Հրաչյա Հարությունյանի ռուսական դատարանի դատավճիռը ճանաչելու վերաբերյալ միջնորդությունը:
Հիշեցնենք, որ 2013 թվականի հուլիսին Հրաչյա Հարությունյանը Պոդոլսկի մերձակայքում բեռնատարով բախվել էր ուղեւորատար ավտոբուսին, ինչի հետեւանքով 18 մարդ էր զոհվել, ավելի քան 60 մարդ տարբեր աստիճանի վնասվածքներ էր ստացել: Հրաչյա Հարությունյանը Ռուսաստանում 6 տարի 9 ամիս ժամկետով ազատազրկման էր դատապարտվել: 2017թ. հուլիսի 20-ին Հրաչյա Հարությունյանը տեղափոխվել է Հայաստանի Հանրապետություն՝ «Դատապարտյալների փոխանցման մասին» 1983թ. եվրոպական կոնվենցիայով սահմանված կարգով պատժի մնացած մասը կրելու համար: