2013թ. Մոսկվայում վթարից հետո ռուսական դատարանի կողմից 6 տարի 9 ամիս ժամկետով ազատազրկման դատապարտված Հրաչյա Հարությունյանն այսուհետեւ իր պատիժը կկրի Հայաստանում: Իր վարած բեռնատարով նա բախվել էր ավտոբուսին, ինչի հետեւանքով 18 մարդ էր մահացել։ Այսօր Երեւանում առաջին ատյանի դատարանը ճանաչեց ռուսական դատարանի համապատասխան վճիռը: Լրագրողները հնարավորություն ունեցան առաջին անգամ հարցեր ուղղելու դատարան բերված Հրաչյա Հարությունյանին: Դատապարտյալն ասաց, որ իրեն մեղավոր է ճանաչում միայն ճանապարհային երթեւեկության կանոնները խախտելու համար: Հրաչյա Հարությունյանը դժգոհել է Ռուսաստանի բանտային պայմաններից: 20 օրվա ընթացքում ՔԿՎ հանձնաժողովը կորոշի՝ որտեղ է կրելու պատիժը Հրաչյա Հարությունյանն ու ինչ ռեժիմով:
Իսպանիայում նախօրեին իրականացված կրկնակի ահաբեկության զոհերի թիվը հասել է 14-ի: Նախ սպիտակ մինիվենը Բարսելոնի զբոսաշրջիկներով լի փողոցում մխրճվել էր բազմության մեջ, այստեղ 13 մարդ է զոհվել, 100-ը՝ վիրավորվել, նրանց թվում 34 երկրների քաղաքացիներ կան: 8 ժամ անց ծովափնյա Կամբրիլս քաղաքում Audi-ն մխրճվել էր բազմության մեջ, այստեղ մեկ մարդ է մահացել: Մեքենան շրջվել է, ոստիկանները սպանել է դրանում գտնվող 5 անձի, որոնք մահապարտի կեղծ գոտիներով են եղել: Բարսելոնի ահաբեկչության կասկածյալը 18-ամյա մարոկկացի Մուսա Ուքաբիր է, նա որոնվում է: Ահաբեկության համար պատասխանատվություն էր ստանձնել «Իսլամական պետությունը»: Բարսելոնում եռօրյա համազգային սուգ է հայտարարվել, կեսօրին կենտրոնական հրապարակում հավաքված հազարավոր մարդիկ մեկ րոպե լռությամբ հարգել են զոհերի հիշատակը, նրանց միացել է նաեւ Իսպանիայի Ֆիլիպե թագավորը: Կատալոնիայի ոստիկանությունը ահաբեկչությունների հետ կապված 4 կասկածյալի է ձերբակալել, ենթադրվում է, որ ահաբեկչական խումբը կազմված է եղել 12 մարդուց:
Սահմռկեցուցիչ դեպք է տեղի ունեցել Տավուշի մարզում. Ներքին Կարմիրաղբյուր գյուղի հանդամասում հայտնաբերվել է այրված մեքենա, սրահում՝ 32-ամյա Վարդան Գրիգորյանի մոխրացած մարմինը: Պայմանագրային զինծառայողին սպանելու կասկածանքով ձերբակալվել է նրա համագյուղացին եւ ծառայակիցը: Ոստիկանությոնը պարզել է, որ օգոստոսի 16-ին 37-ամյա Լալայանը վիճաբանության ժամանակ ծեծելով սպանել է ծառայակցին, նստեցրել է ավտոմեքենան, գլորել այն ձորը եւ այրել: Կասկածյալը ձերբակալված է:
Բնապահպանների գնահատականով Խոսրովի անտառում 3000-5000 հեկտար տարածք է այրվել, չնայած պաշտոնական վարկածով այրված տարածքը շատ ավելի փոքր է։ Ամենացավալին 1000-3000 տարեկան ծառերի կորուստն է։ Ինչ վերաբերում է կենդանիներին, խոշորները հասցրել են փախչել, ավելի շատ տուժել են սողունները, մանր կրծողները եւ միջատները: Հրդեհի բռնկումից 6 օր անց Արտակարգ իրավիճակների նախարարությունը դեռեւս չի պարզել հրդեհի առաջացման պատճառը, սակայն, ամենաշրջանառվող վարկածը մարդկային գործոնն է: NEWS.am-ի նկարահանող խումբն այսօր եղել է Խոսրովի անտառում եւ հարակից տարածքներում, կատարել դրոնով նկարահանումներ:
Սենթ Լուիսում մեկնարկած կայծակնային խաղի մրցաշարի 9 տուրից հետո հայկական շախմատի առաջատար Լեւոն Արոնյանը 18.5 միավորով գլխավորում է մրցաշարային աղյուսակը: Լեւոն Արոնյանը 2 միավորի առավելություն ունի երկրորդ տեղում ընթացող ամերիկացի Հիկարու Նակամուրայի նկատմամբ: Մրցաշարի վերջին 9 տուրերը կանցկացվեն օգոստոսի 18-ին:
Դոլարը, եվրոն եւ ֆունտը թանկացել են, ռուսական ռուբլու փոխարժեքը մնացել է անփոփոխ: Օգոստոսի 18-ին եվրոյի փոխարժեքը կազմել է 561.79 դրամ, դոլարինը՝ 478.57, ռուսական ռուբլունը՝ 8.05, ֆունտինը՝ 616.73 դրամ:
Վաղվանից օդի ջերմաստիճանը կրկին կբարձրանա 4-5 աստիճանով: Մայրաքաղաքում գիշերը կդիտվի մինչեւ 20, ցերեկը՝ մինչեւ 34 աստիճան տաքություն: