Երեւան-Սեւան ճանապարհին այսօր՝ օգոստոսի 19-ին, Hyundai մակնիշի ավտոմեքենայի եւ  մարդատար «ԳԱԶել»-ի բախման հետեւանքով Երեւանի «Սուրբ Գրիգոր Լուսավորիչ» հիվանդանոց է տեղափոխվել 9 քաղաքացի: NEWS.am-ին հիվանդանոցից տեղեկացրին, որ իրենց մոտ տեղափոխված քաղաքացիներն ունեն տարբեր աստիճանի վնասվածքներ, այս պահին նրանք հետազոտություն են անցնում եւ նրանց առողջական վիճակի մասին հստակ տեղեկություններ չեն կարող հաղորդել:

Հիվանդանոց տեղափոխվածների մեջ են նաեւ  երկու անչափահաս՝ 11 եւ 5 տարեկան, նրանք լուրջ վնասվածքներ չունեն:

NEWS.am-ի հետ զրույցում Կոտայքի Առողջապահության եւ սոցիալական ապահովության վարչության պետ Վահագն Ոսկանյանն էլ նշեց, որ իրենց շտապօգնության բրիգադով Երեւան են տեղափոխել 4 քաղաքացու, որոնցից մեկն ունեցել է գանգուղեղային վնասվածք, մեկը ուսահոդի, մյուս երկուսը՝ սալջարդեր:

Shamshyna.com-ի փոխանցմամբ, ժամը 12։40-ի սահմանում Երեւանի բնակիչ՝ 47-ամյա Սեդրակ Բ.-n իր վարած Hyundai մակնիշի 719 ԼՕ 67 համարանիշի բենզատար ավտոմեքենայով Երեւան-Սեւան ավտոճանապարհի 22-րդ կմ հատվածում բախվել է ճանապարհի թույլատրելի հատվածում կայանված Երեւանի բնակիչ՝ 34-ամյա Գագիկ Ն.-ին պատկանող «ԳԱԶ 32 213» մակնիշի 27 ՏՕ 249 համարանիշի մարդատար «ԳԱԶել»-ին։ Հիվանդանոց տեղափոխվածները «ԳԱԶել»-ի ուղեւորներ են եղել։