ԱՄՆ Նյու Ջերսի նահանգում մեքենան կարողացել է կամրջի մի մասից մյուսը թռնել, երբ դրանք իրարից բաժանվել էին, հայտնում է Associated Press-ը։

Կամուջը սկսել է բացվել, երբ Թերենս Նաֆիզն անցնում էր դրա վրայով։ Բացի նրանից մեքենայում էին նրա ընտանիքի երեք անդամները։ Երբ նրանք նկատել են, որ կամուրջը բացվում է, մեքենան կանգնեցնելու համար արդեն ուշ էր։

Նաֆիզը սեղմել է արագության ոտնակն ու մեքենան թռել է ճեղքի վրայով։ Մեքենան վայրէջք է կատարել կամրջի մյուս կողմում, հարվածել ճանապարհային ծածկույթին ու աննշան վնասվածքներ ստացել։ Վարորդն ու ուղեւորները չեն տուժել։

Ոստիկանությունը պարզել է, որ տեղի ունեցածի մեղավորը կամրջի օպերատորն է։ Նա էր որոշել բացել կամուրջը, երբ չի կարողացել ռադիոկապ հաստատել մոտեցող նավի հետ։ Նրա խոսքով՝ լուսային ազդանշանները միացված են եղել, իսկ դարպասները՝ փակ։ Նա կարծում էր, որ կամրջի վրա մեքենա չի մնացել, բայց չէր կարողացել համոզվել դրանում՝ կուրացնող արեւի պատճառով։