Չորս մարդ է զոհվել ու առնվազն չորսը վիրավորվել Դամասկոսում միջազգային ցուցահանդեսի հրթիռակոծության հետեւանքով, ՌԻԱ Նովոստիին այս մասին հայտնել է անվտանգության ուժերում իր աղբյուրը։
Նրա խոսքով՝ գնդակոծությունն իրականացվել է Դամասկոսի Արեւելյան Գուտա արվարձանից, զինված խմբավորումների կողմից։
Դամասկոսում այս տարի միջազգային արդյունաբերական ցուցահանդեսն անցկացվել է վեցամյա ընդմիջումից հետո առաջին անգամ։ Դրան մասնակցում են 43 պետություններ, որոնցից 20-ը ներկայացված են կոմերցիոն կազմակերպություններով, իսկ 23-ը՝ պաշտոնապես, դեսպանատների միջոցով։ Սիրիայի ցուցահանդեսների ու միջազգային շուկաների գլխավոր տնօրեն Ֆարես Ալ Քիրթլին հայտնել է, որ չնայած Դամասկոսի դեմ եվրոպական պատժամիջոցներին՝ միջոցառմանը մասնակցում են ընկերություններ Հունաստանից, Բելգիայից, Ֆրանսիայից, Հոլանդիայից ու Իտալիայից։
Կազմակերպիչներն ակնկալում էին, որ այս տարի ցուցահանդեսը կայցելի 60-70 հազար մարդ։ Հայտնում էին, որ սահմանվել են հսկողության խստացված միջոցառումներ, որպեսզի բացառեն սպառնալիքները միջոցառման ու դրա հյուրերի անվտանգությանը։
Դամասկոսում միջազգային ցուցահանդես անցկացվել է 1954-ից սկսած ամեն տարի մինչեւ 2011-ի ճգնաժամը, ու այն իր տեսակի մեջ խոշորագույն ցուցահանդեսն է համարվել Մերձավոր արեւելքում։