ՀԱՀ միջազգային հարաբերությունների ու համագործակցության նախարարությունը կիրակի հայտնել է, որ դիվանագիտական իմունիտետ է տրամադրում Զիմբաբվեի նախագահի կնոջը՝ Գրեյս Մուգաբեին, որին ՀԱՀ-ում կասկածում են մի աղջկա ծեծելու մեջ, փոխանցում է ՌԻԱ Նովոստին։
«Բոլոր համապատասխան գործոններն ուշադիր քննարկելուց հետո նախարարը հանգել է այն եզրակացության, որ դիվանագիտական իմունիտետի տրամադրումը տվյալ դեպքում հիմնավորված է»,- ասվում է գերատեսչության հայտարարության մեջ։
Ավելի վաղ «Ռոյթեր» գործակալությունը, վկայակոչելով անվտանգության ծառայությունում իր աղբյուրը, հայտնել է, որ ՀԱՀ-ն դիվանագիտական իմունիտետ է տրամադրել Գրեյս Մուգաբեին 20-ամյա մոդելին ծեծելու մասին գործի ֆոնին, ինչը նրան թույլ կտա վերադառնալ Զիմբաբվե ու խուսափել դատական հետապնդումից։ Կիրակի հայտնել էին, որ Զիմբաբվեի նախագահ Ռոբերտ Մուգաբեն ու նրա կինը՝ Գրեյսը վերադարձել են Հարարե։
ՀԱՀ իշխանությունները գործ են բացել Գրեյս Մուգաբեի նկատմամբ, որը տուժածի խոսքով, ծեծել է նրան Յոհանեսբուրգի հյուրանոցում, ուր աղջիկը եկել էր Զիմբաբվեի առաջին տիկնոջ որդիների ուղեկցությամբ։
Զիմբաբվեի նախագահ 93-ամյա Ռոբերտ Մուգաբեն աշխարհի ամենածեր գործող ղեկավարն է։ Նա առաջին անգամ նախագահ է դարձել 1987-ին, սակայն իշխանության է եկել ավելի վաղ, երկրի անկախանալուց անմիջապես հետո՝ 1980-ից սկսած Մուգաբեն վարչապետ է եղել։