Հիմնադիր խորհրդարանի» անդամ, «Սասնա ծռերի» գործով մոտ մեկ տարի կալանքի տակ գտնվող Կարո Եղնուկյանը, որի նկատմամբ դատարանը սանկցիա էր կիրառել եւ 10 ժամով հեռացրել դատարանից, չի ցանկանում, որպեսզի իրեն ՔԿՀ-ից տեղափոխեն դատարան եւ 8 ժամ պահեն դատարանի նկուղում: Այս մասին այսօր` օգոստոսի 21-ին, լրագրողների հետ հանդիպմանն ասաց նրա շահերի պաշտպան Տիգրան Հայրապետյանը` նշելով, որ, եթե իր պաշտպանյալին օգոստոսի 23-ին` «Սասնա ծռեր» խմբի անդամների գործով դատական նիստի օրը, տեղափոխեն դատարան, ակնհայտորեն անմարդկային եւ արժանապատվությունը նվաստացնող գործողություն կորակվի նրա նկատմամբ:
«Արդեն պարզ է, որ ակնհայտորեն ուժ է կիրառվելու նրա նկատմամբ, դատարանը ընդհանուր հրահանգ է ստանում եւ հրաման է տալիս նրան տեղափոխել դատարանի շենք, պահել նկուղում, նույնիսկ այն դեպքոււմ, երբ օրենքով սահմանված կարգով կարող են չտեղափոխել, եթե նրա նկատմամբ սանկցիա կա կիրառված»,-ասաց նա:
Պաշտպանը նշեց, որ իր պաշտպանյալն ունի առողջական խնդիրներ եւ այդ պայմաններում նրան տեղափոխել դատարան եւ նկուղում ութ ժամ պահելն անմարդկային վերաբերմունք է:
Կարո Եղնուկյանը մեղադրվում է Քրեական օրենսգրքի 218 եւ 219 հոդվածներով՝ պատանդ վերցնելուն, շենքեր, շինություններ, տրանսպորտի, հաղորդակցության կամ կապի միջոցներ զավթելուն աջակցելու համար: