Բարսելոնում ահաբեկչություն իրագործած ահաբեկիչները ոսկի եւ թանկարժեք քարեր են վաճառել ու այդ փողով գնել են հարձակման կազմակերպման համար անհրաժեշտ ամեն ինչ, հայտնում է El Confidencial պարբերականը:
Պարբերականը հայտնում է, որ ահաբեկիչները 1200 եվրո են վաստակել, եւ այդ փողով գնել են գազով 106 բալոն, որոնք պահել են Ալկանարում գտնվող բնակելի շենքում, որտեղ օգոստոսի 16-ին, Բարսելոնում ահաբեկչությունից մեկ օր առաջ, պայթյուն էր տեղի ունեցել: Իրավապահ մարմինները պարզում են, թե թանկարժեք իրերն ինչպես են հայտնվել ահաբեկիչների մոտ:
El Mundo պարբերականի տեղեկություններով՝ ահաբեկչությանը նախապատրաստվել են այն իրագործելուց 6 ամիս առաջ:
Օգոստոսի 17-ին Բարսելոնում ֆուրգոնը վարող տղամարդը մխրճվել է անցորդների մեջ: Ավելի ուշ Կատալոնիայի ոստիկանությունը Կամբրիլսում վնասազերծել է 5 ահաբեկիչների: Ահաբեկչության հետեւանքով զոհվել է 14 մարդ: Հարձակման պատասխանատվությունը ստանձնել է «Իսլամական պետություն» ահաբեկչական խմբավորումը:
