Իրանում ՀՀ դեսպան Արտաշես Թումանյանը օգոստոսի 20-ին հանդիպում է ունեցել Իրանի մեջլիսի կրթության եւ հետազոտության հանձնաժողովի նախագահ Մեհդի Զահեդիի հետ` քննարկելու ՀՀ կրթության եւ գիտության նախարարության ու ԻԻՀ գիտության, տեխնոլոգիաների եւ հետազոտությունների նախարարության միջեւ ձեռք բերված պայմանավորվածությունների կատարման ընթացքը:
Հայաստանի ԱԳՆ-ից NEWS.am-ին հայտնում են, որ հանդիպման ընթացքում դեսպան Թումանյանն անդրադարձել է Իրանում ՀՀ բուհերի դիպլոմների ճանաչման խնդրին: Մոհամմադ Մեհդի Զահեդին շնորհակալություն հայտնեց հուլիսին Հայաստանի Հանրապետություն իր գլխավորած պատվիրակության այցը բարձր մակարդակով կազմակերպելու համար` ցանկություն հայտնելով ՀՀ ԱԺ իր գործընկերոջը հրավիրելու Թեհրան:
Խոսելով գիտության ոլորտում երկկողմ համագործակցության զարգացման մասին՝ ԻԻՀ մեջլիսի կրթության եւ հետազոտության հանձնաժողովի նախագահն իր պատրաստակամությունն է հայտնել աջակցելու միջխորհրդարանական համագործակցության ակտիվացմանը:
Հանդիպմանը զրուցակիցներն անդրադարձ կատարեցին կրթության եւ գիտության ոլորտներում երկկողմ համագործակցության մի շարք կարեւոր այլ հարցերի: