ՀՀ բնապահպանության նախարար Արծվիկ Մինասյանի նախագահությամբ կայացել է ՀՀ բնապահպանության նախարարության բնապահպանության եւ ընդերքի տեսչական մարմնի խորհրդի նիստը:
ՀՀ բնապահպանության նախարարությունից NEWS.am-ին հայտնում են, որ նիստին մասնակցել են ՀՀ էներգետիկ ենթակառուցվածքների եւ բնական պաշարների, ՀՀ տնտեսական զարգացման եւ ներդրումների, ՀՀ արդարադատության նախարարությունների, ինչպես նաեւ գիտական ոլորտի եւ հասարակական կազմակերպությունների ներկայացուցիչներ:
Խորհուրդը քննարկել է օրակարգային 2 հարց` ՀՀ բնապահպանության նախարարության բնապահպանության եւ ընդերքի տեսչական մարմնի հաստիքացուցակին եւ քաղաքացիական ծառայության պաշտոնների անձնագրերին հավանություն տալու եւ տեսչական մարմնի ղեկավարի տեղակալների պաշտոններում նշանակելու համար ՀՀ վարչապետին թեկնածուների ներկայացման հարցերը:
Տեսչական մարմնի խորհրդի նախագահ Արծվիկ Մինասյանի առաջարկությամբ, մարմնի հաստիքացուցակում որոշվել է նախատեսված «Տեսչական մարմնի ղեկավարի խորհրդականի» երեք հաստիքները փոխել երկու հաստիքով, ստեղծել մեկ «իրավախորհրդատուի» հաստիք:
Խորհուրդը նաեւ որոշել է հավանություն տալ ՀՀ բնապահպանության նախարարության բնապահպանության եւ ընդերքի տեսչական մարմնի հաստիքացուցակին եւ քաղաքացիական ծառայության պաշտոնների անձնագրերին եւ «Տեսչական մարմինների մասին» ՀՀ օրենքի 8-րդ հոդվածի 1-ին մասի համաձայն` Տեսչական մարմնի ղեկավար Եղիշ Տերտերյանին հանձնարարվել է 1-օրյա ժամկետում ղեկավարի տեղակալների պաշտոններում Մարատ Բադալյանի եւ Իգոր Սարգսյանի թեկնածությունները ներկայացնել ՀՀ վարչապետին:
