Գեղարքունիքի մարզի ընդհանուր իրավասության դատարանի նախագահի, նույն դատարանի դատավորի եւ Գեղարքունիքի դատախազի մասնակցությամբ առանձնապես խոշոր չափերով կաշառք պահանջելու եւ ստանալու գործով հարուցված քրեական գործի նախաքննության ավարտ է հայտարարվել: Այս մասին այսօր՝ օգոստոսի 22-ին, NEWS.am-ի հետ զրույցում ասաց գործով մեղադրյալներից նախկին դատավոր Վանիկ Վարդանյանի շահերի պաշտպան Ռուբեն Հակոբյանը:
Նա նշեց, որ գործի նյութերն արդեն ուղարկվել են կողմերին ծանոթանալու համար: Այն բաղկացած է 15 հատորից:
Հիշեցնենք, որ այս գործով կալանավորված են Գեղարքունիքի մարզի ընդհանուր իրավասության դատարանի նախկին նախագահ Աղվան Պետրոսյանը, նույն դատարանի նախկին դատավոր Վանիկ Վարդանյանը եւ Գեղարքունիքի նախկին դատախազ Սեւակ Շհոյանը: Նրանք չեն ընդունում իրենց առաջադրված մեղադրանքները: