Եվրասիական տնտեսական միություն Թուրքիայի մտնելու դեպքում Հայաստանը քաղաքական եւ տնտեսական առավելություն կստանա: Այս մասին NEWS.am-ի հետ զրույցում ասաց տնտեսագետ Վահագն Խաչատրյանը:
Նրա խոսքով՝ եթե ԵՏՄ հետ Թուրքիայի կողմից մաքսային միության համաձայնագրի ստորագրումը իրականություն դառնա, սա Հայաստանի համար շատ բարենպաստ կլինի: «Հայաստանը, լինելով ԵՏՄ անդամ երկիր, էական ազդեցություն ունի նոր համաձայնագրերի կնքման հետ կապված որոշումների ընդունման վրա: Թուրքիայի եւ ԵՏՄ միջեւ մաքսային միության համաձայնագրի ստորագրման եւ հետագա համագործակցության հարցում Հայաստանի ձայնը քաղաքական տեսակետից վճռորոշ կլինի: Շատ լավ կլինի, եթե Թուրքիան ԵՏՄ-ին միանալու ցանկություն հայտնի: Այդ դեպքում Հայաստանի քաղաքական դերը կմեծանա: Անհրաժեշտ է ողջունել Թուրքիայի նման դիրքորոշումը»,- ընդգծեց Վահագն Խաչատրյանը:
Երկրորդ, շարունակեց տնտեսագետը, շատերն են խոսում այն մասին, որ նման պայմաններում Հայաստանի տնտեսությունը ոչ ձեռնտու դիրքում կհայտնվի, սակայն չարժի դրանից վախենալ: «ԵՏՄ Թուրքիայի մտնելու դեպքում Հայաստանն առավելություն կստանա նաեւ տնտեսական տեսակետից: Ամենագլխավորը՝ սահմանը կբացվի: Եվ վերջապես տնտեսական խնդիրը կկարգավորվի, որը մինչ այդ գոյություն ուներ՝ մենք ուղղակի սահման չունենք ԵՏՄ անդամ ոչ մի երկրի հետ, հիմա մենք նաեւ այս հնարավորությունը կունենանք»,- հավելեց Վահագն Խաչատրյանը:
Տնտեսագետը հույս հայտնեց, որ Հայաստանի ներկայացուցիչներն իրենց հաշվարկներում խելամտություն կդրսեւորեն եւ այս հարցում համաձայնության կգան: «Քանի որ դրանով կլուծվեն նաեւ շատ այլ քաղաքական հարցեր, որոնց մասին այսօր, հավանաբար, չարժի հրապարակայնորեն խոսել: Այս հարցերը վերաբերում են նաեւ երկկողմ հարաբերություններին եւ տարածաշրջանին: Վերջապես՝ Հայաստան-Թուրքիա տնտեսական կապերը չարժի կապել միայն ԵՏՄ հետ. հարցեր կան, որոնք պետք է դառնան ամենօրյա քննարկումների առարկա»,- նշեց Վահագն Խաչատրյանը՝ ընդգծելով, որ Հայաստան-Թուրքիա տնտեսական հարաբերությունները մշտապես օրակարգում են գտնվում:
Հիշեցնենք, որ Թուրքիայի էկոնոմիկայի նախարար Նիհաթ Զեյբեքչին հայտարարել է, որ իր երկիրը պատրաստվում է Եվրասիական տնտեսական միության հետ մաքսային համաձայնագիր ստորագրել: «Չխախտելով Եվրամիության հետ համապատատասխան համաձայնագիրը՝ Թուրքիան ցանկանում է ԵՏՄ հետ եւս համագործակցություն հաստատել»,- ճշգրտել է Զեյբեքչին:
