Բնապահպանության նախարար Արծվիկ Մինասյանը չի պատրաստվում հրաժարական տալ։ Այդ մասին այսօր՝ օգոստոսի 22-ին «Ազատություն» ռադիոկայանի «Ֆեյսբույան ասուլիս» հաղորդման ժամանակ ասել է նախարարը՝ պատասխանելով օգտատերերից մեկի հետեւյալ հարցին՝ «հրդեհներն ապացուցեցին, որ վատ եք պահպանում բնությունը, չե՞ք պատրաստվում հրաժարական տալ»։
«Այս պաշտոնը քաղաքական պաշտոն է եւ բնականաբար որեւէ գործողություն՝ հրաժարական կամ դիմում հեռանալու մասին քաղաքական գործընթաց է։ Այս պաշտոնը զբաղեցնում եմ ՀՅ Դաշնակցություն կուսակցության եւ հանրապետության նախագահի որոշումների հիման վրա եւ բնականաբար որեւէ գործողություն պետք է դիտարկվի նաեւ այդ համատեքստում», - ասել է նախարարը եւ հավելել. «Ես չեմ պատրաստվում հրաժարական տալ երկու պատճառով. առաջին, որ չկա որեւէ գործողություն կամ անգործություն, որը պատճառ կդառնա դրան, երկրորդ՝ ես տեսնում եմ վճռականություն, որ ոլորտում այնքան շատ բարեփոխումներ մենք պետք է իրականացնենք, որ հետագայում նվազագույնի հասցնենք կամ բացառենք նման աղետների վրա գալը»։
Նշենք, որ «Խոսրովի անտառում» օրեր շարունակ մոլեգնող անտառային խոշոր հրդեհից հետո շատերը կոչ էին անում բնապահպանության նախարարին հրաժարական տալ՝ իր պարտականությունները թերի կատարելու հիմնավորմամբ։
