«Սասնա ծռերի» գործով դատական նիստի ժամանակ այսօր՝ օգոստոսի 23-ին դատավոր Արտուշ Գաբրիելյանը դատական սանկցիա կիրառեց ամբաստանյալներից Սեդրակ Նազարյանի եւ Էդվարդ Գրիգորյանի շահերի պաշտպան Լուսինե Սահակյանի նկատմամբ:
Դատարանը կդիմի փաստաբանների պալատ՝ փաստաբանին պատասխանատվության ենթարկելու պահանջով:
Փաստաբան Լուսինե Սահակյանը ցանկանում էր միջնորդություն ներկայացնել, սակայն դատարանը թույլ չէր տալիս՝ նշելով, որ փաստաբանը այս փուլում չի կարող միջնորդություններ ներկայացնել: Այդուհանդերձ, Լուսինե Սահակյանը նշեց, որ միջնորդություններ ներկայացնելու համար հատուկ փուլ նախատեսված չէ, որից հետո ցանկանավ ներկայացնել իր միջնորդությունը: Դատարանը նախ սանկցիա կիրառեց նախազգուշացման տեսքով, այնուհետեւ որոշում կայացրեց դիմել փաստաբանների պա;ատ:
Որոշման հրապարակումից հետո ամբաստանյալների փաստաբանները բոլորը լքեցին նիստերի դահլիճը՝ բոյկոտելով դատական նիստը:
Փաստաբանների խոսքով, դատավոր Արտուշ Գաբրիելյանը խախտում է դատավարական օրենսգիրքը եւ ակնհայտ անօրինական գործողություններ է անում նիստի ընթացքում:
Բանն այն է, որ այսօրվա նիստի ընթացքում Արտուշ Գաբրիելյանը որոշում կայացրեց ամբաստանյալներից Արեգ Կյուրեղյանի շահերի պաշտպան ներգրավել հանրային պաշտպաններից Արմինե Ֆանյանին, որն այդ գործով պաշտպանում է ամբաստանյալներից Արմեն Բիլյանի շահերը: Արմինե Ֆանյանը դատարանում հայտարարեց, որ ինքը չի ցանկանում պաշտպանել Արեգ Կյուրեղյանի շահերը, քանի որ Արեգն իր պաշտպաններից չի հրաժարվել եւ չի ցանկանում նոր պաշտպան ունենալ:
Նշենք, որ պաշտպանները այդ հիմքով էին ցանկանում դատարանին միջնորդություն ներկայացնել, որն այդպես էլ չկարողացան ներկայացնել, քանի որ դատարանը թույլ չտվեց նրանց խոսել:
Դրանից հետո նրանք լքեցին նիստերի դահլիճը:
Դատարանը խորհրդակցական սենյակից վերադառնալով հայտարարեց, որ նիստերի դահլիճը լքած բոլոր պաշտպանների նկատմամբ դատական սանկցիա է կիրառվում՝ Փաստաբանների պալատ դիմելու եւ նրանց պատասխանատվության ենթարկելու պահանով:
Նիստը հետաձգվեց, հաջորդ դատական նիստը տեղի կունենա օգոստոսի 27-ին:
