Իրանի ԱԳ նախարար Մոհամադ Ջավադ Զարիֆը չորեքշաբթի հայտարարել է, որ Իրանն ու Սաուդյան Արաբիան, որը 2016 թվականի ավարտին խզեց դիվանագիտական հարաբերություններն Իրանի հետ, պատվիրակությունների փոխանակում կիրականացնեն։ Այս մասին հաղորդում է «ՌԻԱ Նովոստի»-ն՝ վկայակոչելով Isna-ն։
Գործակալությանը տված հարցազրույցում Իրանի ԱԳ նախարարը հայտարարել է, որ այժմ ավարտվում են Սաուդյան Արաբիայի հետ պատվիրակությունների փոխանակման նախապատրաստությունները։ Պատվիրակությունների անդամները կայցելեն միմյանց դիվանագիտական առաքելություններ։
«Իրանը միշտ ցանկացել է տարածաշրջանում իր հարեւանների հետ լավ հարաբերություններ ունենալ»,-հայտարարել է Զարիֆը՝ խոսելով Սաուդյան Արաբիայի հետ հարաբերությունների մասին։
Զարիֆի խոսքով՝ դիվանագետներին վիզաներ արդեն տրամադրվել են։ ԱԳ նախարարը հայտարարել է, որ այցելությունները տեղի կունենան հաջից հետո։ Այս տարի հաջը կտեւի օգոստոսի 30-ից սեպտեմբերի 4-ը։
