Հայաստանում որոշ փաստաբաններ գործադուլ կսկսեն՝ դատարանի շենք մտնելիս խուզարկության ենթարկվելու համար։ Այս մասին օգոստոսի 23-ին լրագրողների հետ հանդիպման ժամանակ հայտնեց «Սասնա ծռեր»-ի գործով փաստաբան Հայկ Ալումյանը։
Փաստաբանը նշեց, որ նման գործողությունները ոչ միայն ապօրինի, այլեւ վիրավորական են։ Նրա խոսքով՝ նա ինքը խուզարկվել է եւ արդյունքում իրեն թույլ չեն տվել դատարանի դահլիճ մտնել։ Ալումյանն ասաց, որ պատճառը այն է, որ ինքը հրաժարվել է հանձնել գրիչը, որը դատական կատարածուները վտանգավոր են համարել շրջապատի համար։ Սակայն կատարածուներն այդքանով չեն սահմանափակվում։
«Կարո՞ղ եք պատկերացնել, թե որքան վատ ու նվաստացած է իրեն զգում փաստաբանը, երբ նրա պաշտպանյալին դատարանի դահլիճում բռնում են ու նկուղային հարկ տանում, որտեղ նրան ծեծի են ենթարկում, իսկ բղավոցները հասնում են մինչեւ դահլիճ, որտեղ այդ ժամանակ դատական նիստ է ընթանում»,-նշեց Ալումյանը։
Նրա կարծիքով՝ Հայաստանում երբեք նման բան չի եղել , իսկ փաստաբանների վրա այդ աննախադեպ ճնշումը սկսել է գործադրվել 2017 թվականի սկզբից։
Սակայն փաստաբանը նշեց, որ չի պատրաստվում միանալ գործադուլին, այլ դատարան կդիմի՝ փաստաբանական գործունեությանը խոչընդոտելու մեղադրանքով, ինչը քրեական հանցանք է։