«Հիմնադիր խորհրդարանի» անդամ, ապօրինի զենք պահելու մեղադրանքով 1 տարվա ազատազրկման դատապարտված Արմեն Միքայելյանի գործով Վերաքննիչի նիստի ժամանակ այսօր՝ օգոստոսի 23-ին, մեղադրողը բավականին ուշագրավ հայտարարություններ արեց ոստիկանության նկատմամբ հասարակության վերաբերմունքի մասին:
Ամբաստանյալի պաշտպան Երվանդ Վարոսյանի այն հայտարարությունը, թե գործում առկա ապացույցները ոստիկանական ծագման են, ըստ երեւույթին, դուր չեկավ մեղադրող Հակոբ Ենոքյանին:
«Այս խոսքերը հանրության լայն շրջանակի համար ցանկալի են, քանի որ մեր հասարակությունը շարունակում է մնալ ցածր իրավագիտակցության պայմաններում եւ նրանց համար օրենքի նորմերն ավելի ցածր նշանակություն ունեն, քան կոնկրետ ձեւակերպումներով իշխանություններին կամ իշխանության որեւէ ճյուղին արատավորող արտահայտությունները»,- հայտարարեց Հակոբ Ենոքյանը:
Ռեպլիկի կարգով Երվանդ Վարոսյանը հայտարարեց, որ ոստիկանությանը պիտակավորելու որեւէ խնդիր ոչ ոք չունի, քանի որ բոլորին պարզ է, թե ոստիկանությունն ինչով է զբաղված:
«Երբ մենք ասում ենք, որ ոստիկանական ծագման է, ոստիկանությունն այս վարույթում փաստացի կողմ է, մեղադրողն ավելի ճիշտ հասկացավ, հասկացավ այնպես, ինչպես մեր հասարակությունն է հասկանում, ինքն էլ ասաց, որ հասարակության մոտ դրական վերաբերմունք է առաջանում, երբ ոստիկանությանն ես քարկոծում, մի հատ էլ ասում է, որ հասարակությունը ցածր իրավագիտակցություն ունի: Մեր հասարակությունը ցածր իրավագիտակցություն չունի, եթե այդպես է ասում, ուրեմն այդպես է: Մեր հասարակությունն աշխարհի ամենաարդարամիտ հասարակությունն է, եթե մեկին այդ գնահատականը տալիս է, ուրեմն արժանի է դրան»,- ասաց Երվանդ Վարոսյանը:
Պաշտպանի խոսքն ընդհատեց նախագահող դատավորը՝ փորձելով թույլ չտալ շարունակել խոսքը: Այդ ընթացքում բորբոքված սկսեց խոսել դատավոր Մհեր Արղամանյանը:
«Իհարկե, արժանի էին այն մարդիկ, որոնք ոստիկան լինելով մահացան»,- տեղից հայտարարեց Մհեր Արղամանյանը:
Այս խոսքերից հետո Երվանդ Վարոսյանն ինքնաբացարկի միջնորդություն ներկայացրեց դատավորին. «Արմեն Միքայելյանը «Հիմնադիր խորհրդարանի» անդամ է եւ Ձեր կողմից նշվածն ուղիղ կապ ունի «Հիմնադիր խորհրդարանի» հետ, ստեղծված իրավիճակում չեք կարող Դուք անկողմնակալ լինի»:
Մհեր Արղամանյանը, վերադառնալով խորհրդակցական սենյակից, մերժեց միջնորդությունը:
Ավելի վաղ հայտնել էինք, որ Արմեն Միքայելյանը ձերբակալվել էր 2016թ. հուլիսի 27-ին, երբ Երեւանի Խորենացի փողոցում ցույցից հետո ընտանիքով վերադառնալիս էր եղել տուն: Նրան մեղադրանք էր առաջադրվել ՀՀ ՔՕ 235 հոդվածով (ապօրինի զենք, զինամթերք պահել): 20 օր անազատության մեջ մնալուց հետո Արմեն Միքայելյանն ազատ էր արձակվել:
2017թ. մարտին Մալաթիա- Սեբաստիա վարչական իրավասության դատարանն Արմեն Միքայելյանին մեղավոր էր ճանաչել եւ դատապարտել 1 տարվա ազատազրկման: Դատարանը որոշում էր կայացրել Միքայելյանին կալանավորել հենց նիստերի դահլիճից:
