Մեծ Բրիտանիայի հանդուգն այցելուները կոտրել են ավելի քան 800-ամյա դագաղը՝ փորձելով դրա մեջ իրենց երեխային լուսանկարել: Ընտանիքը փոքրիկին անցկացրել է արգելափակոցի վրայով եւ նրան նստեցրել ցուցադրանմուշի մեջ, որի հետեւանքով մասերից մեկը հատակին է ընկել, իսկ դագաղից կտոր է պոկվել, հայտնում է New York Post-ը:
Սաութհենդ քաղաքի թանգարանի անձնակազմը ցնցված էր, երբ ավերածությունը տեսել է: Հիմա ջարդված դագաղը ցանկանում են ցուցադրությունից հանել՝ մնացած մասերը պահպանելու համար:
Ավազաքարե դագաղը 1921 թվականին հայտնաբերվել է տեղական վանքի տարածքում: Ներսում կմախք է եղել, որը, ենթադրաբար, վանականի է պատկանել:
