Ֆինլանդիայի հատուկ ծառայությունների աշխատակիցները 2 տղամարդու են ձերբակալել, որոնք, ենթադրաբար, կապված են մարոկկացի Աբդերռահման Մեշքահի հետ, որը Տուրկուում դանակով հարձակվել էր անցորդների վրա: Այս մասին հայտնում է Helsingin Sanomat-ը:
Տղամարդիկ իրենց մասին հակասական տեղեկություններ են հայտնել: Ֆիննական ծառայությունների փաստաթղթերում նրանք նշված են որպես ալժիրցի, իսկ շվեդական անվտանգության մարմինների դոսյեներում՝ որպես մարոկկացի:
Ավելի վաղ՝ օգոստոսի 22-ին, Տուրկուի դատարանը որոշել է կալանավորել Մեշքահին եւ նրան բանտային հիվանդանոց տեղափոխել: Մարոկկացին իրեն մեղավոր է ճանաչել անցորդների վրա հարձակվելու մեջ, սակայն ժխտել է, որ իր գործողությունները ահաբեկչական բնույթ են ունեցել:
Դանակով զինված Մեշքահը օգոստոսի 18-ին քաղաքի կենտրոնում դանակով հարձակվել է անցորդների վրա: Նրա զոհն են դարձել 2 կին, եւս մի քանի մարդ վնասվածքներ են ստացել: Իշխանությունները տեղի ունեցածը ահաբեկչություն են ճանաչել:
Ոստիկանները կրակել են հարձակվողի վրա եւ նրան ոտքից վիրավորել, որից հետո նա ձերբակալվել է: Ավելի ուշ այս հանցագործության քննության շրջանակում իշխանությունները ձերբակալել են Մարոկկոյի եւս 4 հպատակների: