Սոչիում տեղի է ունեցել Հայաստանի եւ Ռուսաստանի նախագահների հանդիպումը: Վլադիմիր Պուտինը նշել է, որ երկու երկրներն ինտենսիվ քաղաքական երկխոսություն են պահպանում, համագործակցում են թե՛ տնտեսական, թե՛ անվտանգության եւ ռազմական ոլորտներում:
Սերժ Սարգսյանն իր հերթին հիշեցրել է, թե վերջին տարիները երկու երկրների միջպետական հարաբերությունների համար որքան ինտենսիվ ժամանակաշրջան են եղել: Նրա խոսքով՝ ռազմավարական դաշնակցային հարաբերություններն առանձնանում են բարձր մակարդակի ինտենսիվ երկխոսությամբ, արտաքին քաղաքական լայն համակարգմամբ: Մեր երկրի ղեկավարը նաեւ երախտագիտություն է հայտնել ռուսաստանցի պաշտոնակցին՝ Հայաստանի անտառային խոշոր հրդեհների մարմանն օգնելու համար:
Սերժ Սարգսյանի հրավերով այսօր պաշտոնական այցով Երեւան է ժամանել Թուրքմենստանի նախագահը: Այցի շրջանակում նախատեսված են Թուրքմենստանի նախագահի հանդիպումները Հայաստանի բարձրագույն ղեկավարության հետ, սպասվում է փաստաթղթերի ստորագրման արարողություն:
Աշխարհի եռակի չեմպիոն Արթուր Ալեքսանյանը եւ աշխարհի չեմպիոնի կոչումն առաջին անգամ նվաճած Մաքսիմ Մանուկյանը հունահռոմեական ըմբշամարտի Հայաստանի հավաքականի հետ վերադարձան հայրենիք: «Զվարթնոց» օդանավակայանում նրանք արժանացան մարզասերների եւ սպորտի ղեկավարների ջերմ ընդունելությանը: Ռիո-2016-ի օլիմպիական չեմպիոն Արթուր Ալեքսանյանը Երեւանում հայտարարեց, որ չի բավարարվելու այս տիտղոսներով:
Հավաքականի գլխավոր մարզիչ Լեւոն Ջուլֆալակյանի համար Մաքսիմ Մանուկյանի չեմպիոնական տիտղոսը սպասելի էր: Հաջողության գրավականը նա համարում է 85 կգ-ից 80 կգ քաշային կարգ իջնելը: 30-ամյա ըմբիշը նախկինում որեւէ մեդալ մեծահասակների աշխարհի ու Եվրոպայի առաջնություններում չէր նվաճել:
«Սասնա ծռերի» գործով դատական նիստն այսօր էլ անցավ լարված մթնոլորտում: Երկու շաբաթ տեւած ընդմիջումից հետո դատավոր Արտուշ Գաբրիելյանը կրկին դատական սանկցիա կիրառեց ամբաստանյալների այն պաշտպանների նկատմամբ, որոնք ներկա էին այսօրվա նիստին: Փաստաբաններին վրդովվեցրել էր ամբաստանյալներից Արեգ Կյուրեղյանին առանց իր համաձայնության հանրային պաշտպան տրամադրելու՝ դատարանի որոշումը: Հենց դրա վերաբերյալ փաստաբաններից Լուսինե Սահակյանը ցանկանում էր միջնորդությամբ հանդես գալ, սակայն Արտուշ Գաբրիելյանը թույլ չտվեց նրան խոսել եւ դատական սանկցիա կիրառեց:
Նրա հեռանալուց հետո դատարանը սանկցիա կիրառեց նիստին ներկա բոլոր փաստաբանների նկատմամբ: Մինչեւ փաստաբանների բոյկոտը՝ դատավորը նիստերի դահլիճ հրավիրեց Պավլիկ Մանուկյանին, Արեգ Կյուրեղյանին եւ Կարո Եղնուկյանին՝ նրանց ինքնությունը ճշտելու նպատակով:
Այսօրվա նիստին լրացավ նաեւ Արայիկ Խանդոյանի եւ Գագիկ Եղիազարյանի նկատմամբ կիրառված սանկցիաների ժամկետը եւ նրանք բերվեցին նիստերի դահլիճ: «Միայնակ գայլը» դատավորի հարցերին պատասխանելու ժամանակ Արտուշ Գաբրիելյանին դիմեց «Պարոն Միկոյան»՝ նկատի ունենալով Անաստաս Միկոյանին:
Վերաքննիչ քրեական դատարանն այսօր անփոփոխ թողեց «Հիմնադիր խորհրդարանի» անդամ Արմեն Միքայելյանին 1 տարով ազատազրկման դատապարտելու մասին առաջին ատյանի կայացրած դատավճիռը: Արմեն Միքայելյանը մեղադրվում է ապօրինի զենք-զինամթերք ձեռք բերելու եւ կրելու մեջ: Այսօր Վերաքննիչում պաշտպան Երվանդ Վարոսյանը պահանջեց արդարացնել իր պաշտպանյալին: Վարոսյանն իր բողոքում նշել էր, որ գործում առկա ապացույցները ոստիկանական ծագման են: Մեղադրողը բողոքի վերաբերյալ առարկությունը ներկայացնելիս անդրադարձավ փաստաբանի այս հայտարարության վրա:
Մինչ Երվանդ Վարոսյանը փորձում էր բացատրել, որ իր հայտարարությունը լրիվ ուրիշ բանի մասին էր, դատավորներից Մհեր Արղամանյանը հարկ համարեց հիշել ոստիկանության ՊՊԾ գնդի գրավումը: Երվանդ Վարոսյանը դատավորին ինքնաբացարկի միջնորդություն ներկայացրեց, որն էլ մերժվեց: Այնուհետեւ դատարանը խորհրդակցական սենյակից շատ կարճ ժամանակ անց վերադառնալով մերժեց Վերաքննիչ բողոքը, որի հրապարակման ժամանակ դատախազն արդեն հեռացել էր նիստերի դահլիճից:
Մասիսի քաղաքապետի եղբայրը հայտնվել է լրատվամիջոցների ուշադրության կենտրոնում: Ըստ տարածված լուրերի՝ Մասիսում օրեր առաջ քաղաքապետի եղբայրն ու մերձավորները ծեծկռտուք են սարքել, որի ընթացքում քաղաքացիներ են դանակահարվել, մի քանիսն էլ գլխի շրջանում ծանր վնասվածքներ են ստացել: Մասիսի քաղաքապետը, որը Վլադիմիր Գասպարյանի թիկնազորի պետ Արշակ Հակոբյանի փեսան է, NEWS.am-ի հետ զրույցում հերքեց մամուլի տեղեկությունները՝ նշելով, որ ծեծկռտուք Մասիսում իսկապես եղել, բայց իր եղբայրն ու մերձավորները դրա հետ առնչություն չունեն: Ոստիկանությունում ահազանգ կա, նյութեր են նախապատրաստվում:
Վայոց ձորում օգոստոսի 10-ին բռնկված խոշոր հրդեհի դեպքով արդեն մեղադրյալ կա: Քննչական կոմիտեից հաղորդում են, որ մեղադրյալն Արտավանի բնակիչներից է, հրդեհը բռնկվել է նրա անսարք ավտոմեքենայի շահագործման ժամանակ խլացուցիչից արտանետված բոցերի հետեւանքով: Տղամարդը ստորագրությամբ ազատ է արձակվել: Իսկ երկու օր անց «Խոսրովի անտառում» բռնկված հրդեհի գործով դեռեւս նախնական վարկած էլ չկա, թե ինչից կարող էր առաջանալ նման խոշոր հրդեհը:
Դոլարի ու ռուբլու փոխարժեքները մնացել են անփոփոխ, իսկ եվրոն թանկացել է: Օգոստոսի 23-ին եվրոյի փոխարժեքը կազմել է 563 դրամ, դոլարինը՝ 478, ռուբլունը՝ 8.10, ֆունտինը՝ 612 դրամ:
Հանրապետությունում օգոստոսի 24-ին նույնպես սպասվում է առանց տեղումների եղանակ, օդի ջերմաստիճանն էապես չի փոխվի: Մայրաքաղաքում օգոստոսի 24-ի գիշերը կդիտվի +19+21, ցերեկը՝ +34+36 աստիճան տաքություն: