Վանաձորում օգոստոսի 23-ի գիշերը վրաերթի ենթարկված տղամարդու վիճակը բավարար է: Այսօր՝ օգոստոսի 24-ին, NEWS.am-ի հետ զրույցում Վանաձոր բժշկական կենտրոնի տնօրեն Վարդան Աբովյանը նշեց, որ 37-ամյա Կարեն Նալբանդյանն ունի ճաճանչոսկրի եւ ազդոսկրի կոտրվածքներ, նրա վիճակը կայուն է:
Ավելի վաղ տեղեկացրել էինք, որ Վանաձորում վրաերթի է ենթարկվել 37-ամյա տղամարդ: Shamshyan.com-ի փոխանցմամբ, ժամը 23:25-ի սահմանում ВАЗ 2121 մակնիշի 01 XX 033 համարանիշի ավտոմեքենայի վարորդը Վանաձոր քաղաքի Տիգրան Մեծի պողոտայում՝ Մանկավարժական համալսարանի հարեւանությամբ, վրաերթի է ենթարկել հետիոտնին, որը Վանաձոր քաղաքի Գիրիգոր Լուսավորիչ փողոցի բնակիչ, 37-ամյա Կարեն Նալբանդյանն է: Դեպքի վայր ժամանած ոստիկանները Niva-ի մոտ չեն հայտնաբերել վարորդին եւ այս պահին ճշտում են վարորդի ինքնությունը, նշված ավտոմեքենան պատկանում է Լոռու մարզի Վանաձոր քաղաքի նախկին դատախազության դատախազ Արծվիկ Ասատրյանի տղային՝ Երեւան քաղաքի Վրացական 4-րդ նրբանցքի բնակիչ, 24-ամյա Սեւակ Ասատրյանին: