Եվրոպայում հարկավոր է Հետաքննությունների դաշնային բյուրո (ՀԴԲ) ստեղծել՝ «Իսլամական պետություն» ահաբեկչական խմբավորման դեմ պայքարելու համար: Այս մասին հայտարարել է Եվրախորհրդարանի նախագահ Անտոնիո Տայանին, գրում է ՏԱՍՍ-ը:
Նրա խոսքով՝ «ԻՊ-ն փորձում է հարձակումներ իրականացնել ամբողջ մայրցամաքում»:
«Հարկավոր է համադրված աշխատել, քանի որ երբեմն համագործակցության պակաս կա: Մենք կարող ենք ավելին անել դատախազությունների, ոստիկանություննների, հետախուզությունների փոխգործակցության շնորհիվ»,- Onda Cero ռադիոկայանին տված հարցազրույցում ասել է Տայանին՝ հավելելով. «Կարծում եմ՝ Եվրոպայում պետք է ՀԴԲ գործի՝ ԻՊ-ի դեմ պայքարելու համար»:
Եվրախորհրդարանի ղեկավարը նաեւ նշել է, որ երիտասարդության ծայրահեղականացման կանխումը պետք է սկսել կրթական մակարդակից: «Եթե նա եվրոպացի է, բայց այլ երկրից, հարկավոր է նրան բացատրել Եվրոպայի արժեքները»,- նշել է Տայանին:
ԵԽ նախագահը նաեւ ուշադրություն է հրավիրել «ոչ միայն արաբերեն, այլեւ իսպաներեն, իտալերեն, գերմաներեն խոսող եվրոպական իմամների պակասի ուղղղությամբ»: «Հորդանանում ոստիկանությունը գիտի, թե ինչի մասին է խոսում իմամը»,- ասել է Անտոնիո Տայանին: Նրա խոսքով՝ Բարսելոնայում ահաբեկչության ենթադրյալ կազմակերպիչ, իմամ Աբդելբաքի աս-Սաթին «ահաբեկիչ էր, կրոնի մասին չէր խոսում»: