Հայաստանում հողային եւ ջրային պաշարները, ինչպես նաեւ գոյություն ունեցող ենթակառուցվածքներն անարդյունավետ են օգտագործվում: Դա անթույլատրելի է գյուղացիական տնտեսությունների զարգացման ընդունված ծրագրի պայմաններում: Օգոստոսի 24-ի կառավարության հերթական նիստում այս մասին հայտարարեց ՀՀ վարչապետ Կարեն Կարապետյանը:
Ըստ նրա՝ հողային հաշվետվության տվյալների համաձայն, ոռոգվող հողատարածքները հանրապետությունում կազմում են շուրջ 208 հազար հա: «Սակայն վերջին տարիներին փաստացի ոռոգվող տարածքները 90-130 հազար հեկտարի սահմաններում են: Հետազոտությունները ցույց են տալիս, որ այդ տարբերությունը պայմանավորված է հատկապես հողային եւ ջրային պաշարների, ինչպես նաեւ գոյություն ունեցող ենթակառուցվածքների անարդյունավետ օգտագործմամբ»,- նշեց Կարեն Կարապետյանը:
Ելնելով վերոնշյալից՝ վարչապետը տարածքային կառավարման եւ զարգացման նախարար Դավիթ Լոքյանին, բնապահպանության նախարար Արծվիկ Մինասյանին, գյուղնախարար Իգնատի Առաքելյանին եւ մարզպետերին հանձնարարեց մեկամսյա ժամկետում Ջրային տնտեսության պետական կոմիտեին նյութեր, տվյալներ ու տեղեկություններ ներկայացնել, որոնք անհրաժեշտ են ոռոգվող տարածքների ավելացման համար: