Երեք խոշոր ընկերություններ դադարեցրել են Թեխասի Հյուսթոն քաղաքի մերձակայքում գտնվող նավթ մշակող գործարանների աշխատանքները, որտեղ մոլեգնում է «Հարվի» արեւադարձային փոթորիկը։ Այս մասին հաղորդում է «ՌԻԱ Նովոստի»-ն՝ վկայակոչելով Wall Street Journal պարբերականը։

Ամերիկյան ExxonMobil նավթային կորպորացիան հայտնել է Բեյթաունում ձեռնարկության աշխատանքը դադարեցնելու մասին, որը կարող է օրական 560 հազար բարել նավթ վերամշակել։

Պարբերականի տվյալներով՝ նիդեռլանդա-բրիտանական Royal Dutch Shell ընկերությունը եւս դադարեցրել է Դիր Փարքում իր ձեռնարկության աշխատանքները, որի հզորությունն օրական 325 հազար բարել է։

Նման որոշում է կայացրել նաեւ բրազիլական Petrobras ընկերությունը՝ դադարեցնելով Փասադինայում գործարանի աշխատանքները։ Դադարեցվել են նաեւ Մեքսիկական ծոցի ափին՝ Կորպուս Քրիստի քաղաքի շրջանում գտնվող գործարանների աշխատանքներ։ Փակված ձեռնարկությունների ընդհանուր արժեքն օրական ավելի քան 2 մլն բարել է։