Նախագահ Սերժ Սարգսյանն այսօր ընդունել է Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Յուրի Խաչատուրովին, ով պաշտոնը ստանձնելուց հետո առաջին անգամ այցելել է Հայաստան:
Հանրապետության Նախագահը եւ ՀԱՊԿ գլխավոր քարտուղարը քննարկել են ընդհանուր առմամբ ՀԱՊԿ պատասխանատվության գոտում եւ, մասնավորապես, Հարավային Կովկասում խաղաղության, կայունության եւ անվտանգության ամրապնդմանն առնչվող հարցեր:
Նշելով, որ այս տարի լրանում է Հավաքական անվտանգության պայմանագրի ստորագրման 25 եւ Հավաքական անվտանգության պայմանագրի կազմակերպության ձեւավորման 15 տարին՝ Հանրապետության Նախագահն ընդգծել է, որ այս տարեդարձները լավ առիթ են անդրադառնալու կազմակերպության անցած ճանապարհին եւ ուղենշելու զարգացման հետագա ընթացքը:
Սերժ Սարգսյանը կարեւորել է անցած տարի Երեւանում ընդունված՝ մինչեւ 2025թ. ՀԱՊԿ Հավաքական անվտանգության ռազմավարության իրականացման ուղղությամբ կատարվող աշխատանքները:
ՀԱՊԿ գլխավոր քարտուղարը շնորհակալություն է հայտնել ընդունելության համար եւ զեկուցել վերջին շրջանում կազմակերպության կողմից իրականացված աշխատանքների եւ կայացած միջոցառումների մասին:
Զրուցակիցները մտքեր են փոխանակել նաեւ տարածաշրջանային եւ միջազգային օրակարգի արդիական հարցերի շուրջ:
.jpg)
.jpg)
