«Նաիրիտ» գործարանում հրդեհը միտումնավոր է արվել: Այս մասին, այսօր՝ օգոստոսի 29-ին, լրագրողների հետ հանդիպման ժամանակ նշել է բնապահպան Սիլվա Ադամյանը:
«Նաիրիտը» մի հսկա գիգանտ էր, որ դեռ ԽՍՀՄ ժամանակ տալիս էր կաուչուկի մի քանի տեսակներ, որոնք արտահանվում էին նաեւ ԽՍՀՄ-ից դուրս: Արվեց մեծ սխալ, երբ փակվեց գործարանը, թեեւ շատերը պնդում էին, որ դա առաջընթաց կտա Հայաստանին»,-ասաց նա:
Անդրադառնալով բնապահպանական խնդիրներին, Ադամյանը նշեց, որ «Նաիրիտի» հետ կապված միշտ բնապահպանական խնդիրներ եղել են, դեռ խորհրդային տարիներից բարձրաձայնվել է, որ շրջակա միջավայրին, նաեւ շրջապատի մարդկանց լուրջ վնաս է պատճառվում. «Ես կարծում եմ, որ շրջապատի մարդկանց գոնե պետք է տեղափոխեն: Այսօր մենք ունենք խաբված աշխատակիցներ, կիսաթալանված գործարան»։
Ադամյանի խոսքով, Նաիրիտն ամբողջությամբ թալանվել է. «Դեռ 2010 թվականին նաիրիտցիները բարձարաձայնեցին, որ էթինոլ լաքը պահեստավորվում է հենց նույն վայրում, որը չպետք էորոեշակի քանակից անցնի: Եթե անցնում է այդ քանակը, ապա դա վտանգ է «Նաիրիտի» համար»:
Սիլվա Ադամյանը համոզմունք հայտնեց, որ հրդեհը միտումնավոր է արվել. «Որովհետեւ մենք շատ լավ գիտենք, որ ուզում էին վերավաճառել, երկրորդ՝ նախկին տերերը շատ բան փակում էին, շատ բաներ կային, որ չէր կարելի ցուցադրել հանրությանը: Սա խայտառակ մի իրավիճակ է, եւ որպեսզի այդ ամենը ծածկվի, այդ խնդիրները զրոյանան, իրենց արած թալանը չերեւա, մենք ունեցանք այս հրդեհը»։