ՀՀ ԱԻՆ փրկարար ուժերն ավարտել են Վրաստանում՝ Բորժոմիի կիրճում հրդեհաշիջման աշխատանքները եւ վերադարձել Հայաստան:
Հայ հրշեջ-փրկարարներն ամբողջությամբ իրականացրել են իրենց առջեւ դրված խնդիրները՝ մեկուսացնելով ու մարելով հրդեհը բոլոր տեղամասերում:
Հրդեհաշիջում կատարելով 3 դժվարմատչելի տեղամասերում՝ փրկարարներին հաջողվել է նաեւ կանխել կրակի տարածումը հարակից Դաբա եւ Ծաղվերի բնակավայրեր:
Ետդարձի ճանապարհին փրկարարներն այցելել են հայաշատ Ախալքալաք քաղաքի Սուրբ Խաչ եկեղեցի, մասնակցել պատարագին՝ նոր ուժով ծառայություն իրականացնելու օրհնություն ստացել:
Մեկշաբաթյա հրդեհաշիջման աշխատանքներում ներգրավվածության եւ անձնուրաց ծառայության համար ՀՀ ԱԻՆ աշխատակիցներին անձամբ շնորհակալական խոսք են ուղղել Վրաստանի նախագահ Գ. Մարգվելաշվիլին, վարչապետ Գ. Կվիրիկաշվիլին եւ ներքին գործերի նախարար Գ. Մգեբրիշվիլին:
Հիշեցնենք, որ Վրաստանի Բորժոմիի կիրճում բռնկված հրդեհը կանխելու նպատակով օգոստոսի 22-ին ՀՀ ԱԻՆ փրկարար ծառայության 8 հրշեջ-փրկարարական եւ 1 փրկարարական ավտոմեքենա, Աղետների բժշկության կենտրոնի 1 մեքենա եւ շարժական կառավարման կենտրոնը՝ 57-հոգանոց անձնակազմով մեկնել էին Վրաստան: