Երեւանի էրեբունու վարչական շրջանի Ռոստովյան փողոցում օգոստոսի 29-ին Weekend բիլիարդ բարում 24-ամյա աղջկան պատանդ վերցրած 31-ամյա Գոռ Հակոբյանը, պարզվում է, ԱՄՆ-ում գտնվելու ժամանակ դատապարտված է եղել սպանության մեղադրանքով, հաղորդում է «Փաստինֆոն»: 

Ավելի վաղ նշվել էր, որ տղան վերջերս է ԱՄՆ-ից արտաքսվել Հայաստան: Հայտնի է դարձել, որ նա եւ աղջիկը ծանոթներ են եղել, եւ 2 ամիս բնակվել են միասին:

Սակայն նրանց երկուսին ամենայն հավանականությամբ միասին կապել է թմրամոլությունը, տղան թմրամոլ է եղել, իսկ աղջիկն էլ, մեզ հայտնի դարձած տեղեկությունների համաձայն, նույնիսկ դատապարտվել է 2016թ. նոյեմբերին:

Ըստ նրան առաջադրված մեղադրանքի՝ 24-ամյա աղջիկը մեկ այլ երիտասարդից տեղեկացել է «Մեթամֆետամին» տեսակի թմրամիջոց ապօրինի ձեռք բերելու մտադրության մասին եւ նրան նախապես խոստացել է ձեռք բերել թմրամիջոց:

Դատական ակտի համաձայն՝ աղջիկը դատապարվել է 2,5 տարի ժամկետով ազատազրկման, սակայն նրա նկատմամբ նշանակված պատիժը պայմանականորեն չի կիրառվել եւ սահմանվել է փորձաշրջան՝ 3 տարի ժամկետով։

Բացի այդ, աղջկա նկատմամբ՝ պատժի կատարման հետ միացված, արտահիվանդանոցային հոգեբուժական օգնություն ցուցաբերող առողջապահական մարմինների հաստատությունում նշանակվել է հարկադիր բուժում թմրամոլությունից։

Ավելի վաղ NEWS.am-ը հայտնել էր, որ «Weekend» բիլիարդ բարում նախնական տվյալով քաղաքացուն պատանդ վերցրած տղամարդուն վնասազերծել են դիպուկահար կրակոցով: 31-ամյա Գոռ Հակոբյանին հիվանդանոց են հասցրել արդեն մահացած: Պարզվել է, որ նա վերջերս էր արտաքսվել ԱՄՆ-ից, ըստ մամուլի տեղեկությունների, նա «Կայարանցի Բիբոսի» տղան է, որը եւս բնակվում է ԱՄՆ-ում:

Հարուցվել է քրեական գործ՝  ՀՀ քրեական օրենսգրքի 218-րդ հոդվածի 2-րդ մասի 2-րդ եւ 3-րդ կետերով՝ զենքի գործադրմամբ կյանքի կամ առողջության համար վտանգավոր բռնություն գործադրելով պատանդ վերցնելու հատկանիշներով:

Առավել մանրամասն՝ սկզբնաղբյուր կայքում: