«Սասնա ծռերի» գործով ամբաստանյալներ Սմբատ Բարսեղյանի եւ Արեգ Կյուրեղյանի համար հանրային պաշտպան ներգրավվելու դատարանի որոշումն ակնհայտ ապօրինի է: Լրագրողների հետ զրույցում նման կարծիք հայտնեց այդ գործով պաշտպան Լուսինե Սահակյանը:
Սահակյանի խոսքով, փաստաբանն առհասարակ իրավունք չունի իր պաշտպանյալի շահերին դեմ գործողություն կատարել:
«Եթե պաշտպանն արդեն կարծում է, որ ներգրավված պաշտպան է, պետք է պաշտպանություն իրականացնի: Հակառակ դեպքում, նա իրավունք չունի գտնվելու դատարանի դահլիճում եւ այդպիսով օրինականացնի դատարանի որոշումը, որովհետեւ դատարանի որոշումն ակնհայտ ապօրինի է: Ստացվում է, որ հանրային պաշտպանները, որոնք պաշտպանություն չեն իրականացնելու, գալու են, նստեն դահլիճում, իրենց աշխատանքը չկատարեն եւ պետության կողմից վարձատրվեն, ընդունելի՞ տարբերակ է, իհարկե, ոչ»,- ասաց Լուսինե Սահակյանը:
Փաստաբանը նշեց, որ սա Կոնվենցիայի 6-րդ հոդվածի խախտում է: Նշենք, որ իր որոշումը ներկայացնելիս Արտուշ Գաբրիելյանը հղում կատարել ՄԻԵԴ-ի որոշումների: Լուսինե Սահակյանը, սակայն նշեց, որ դատարանը չի պատկերացնում, թե ինչ որոշումների է հղում կատարում:
«Հենց Եվրոպական դատարանի այն որոշումներին հղում կատարեց, որտեղ ասվում է՝ հանրային պաշտպանը պարտավոր է պաշտպանություն իրականացնել, եւ այն պետք է լինի լիարժեք: Եթե լիարժեք պաշտպանություն չի իրականացնում, պատասխանատուն պետությունն է դառնում: Հիմա այստեղ պաշտպանն ասում է՝ ես ընդհանրապես չեմ իրականացնելու պաշտպանություն, ոչ թե վատ եմ իրականացնելու, ուղղակի դատարանի դահլիճում է գտնվելու, սակայն թե ինչ նպատակով, անհասկանալի է»,- ասաց փաստաբանը:
Հիշեցնենք, որ օգոստոսի 30-ին առանց ամբաստանյալներ Սմբատ Բարսեղյանի եւ Արեգ Կյուրեղյանի համաձայնության՝ դատարանը երկրորդ հանրային պաշտպանին ներգրավվեց: Գարեգին Մարգարյանը հայտարարեց, որ ինքը նիստերին ներկայանալու է, սակայն պաշտպանություն չի իրականացնելու: Հետաքրքիր է, որ ամբաստանյալ Արմեն Բիլյանի դեպքում դատարանը հաշվի առավ նրա ցանկությունն ու հանրային պաշտպան չներգրավվեց: