Նոր մանրամասներ են հայտնի դարձել նախօրեին Երեւանի բիլիարդանոցներից մեկում երիտասարդ աղջկան պատանդ վերցնելու դեպքի մասին: Պարզվում է՝ 23-ամյա աղջկան պատանդ վերցրած եւ արդյունքում դիպուկահարի կրակոցից մահացած 31-ամյա Գոռ Հակոբյանը մինչեւ վերջերս բնակվել է ԱՄՆ-ում, այնտեղ դատապարտվել է ծանր հանցագործության համար, ապա արտաքսվել Հայաստան: Նա եւ պատանդառված աղջիկը մինչեւ այս դեպքը մոտ երկու ամիս միասին են ապրել: Նախորդ գիշեր նրանք միասին են մտել չգործող խաղասրահ: Ինչ է կատարվել դրանից հետո, պարզ չէ: Հաջորդ օրը ժամը 15:30-ի սահմաններում Գոռը սկսել է կոտրել խաղասրահի ապակիները եւ վնասել գույքը: Ըստ Քննչական կոմիտեի՝ երիտասարդն այդ կերպ փորձել է անցորդների ուշադրությունը հրավիրել: Դեպքի վայր եկած իրավապահների հետ բանակցելիս նա պահանջել է ներս հրավիրել 5 քաղաքացիների եւ 1 փաստաբանի՝ հակառակ դեպքում սպառնալով սպանել աղջկան: Իրավապահ մարմինները որեւէ տեղեկություն չեն հաղորդում այն մասին՝ արդյոք դիպուկահարի կրակոցով հանցագործին սպանելուց առաջ սպառել են բանակցային բոլոր միջոցները, օրինակ, փորձել են արդյոք երիտասարդին համոզել հոգեբանի կամ նրա հարազատների միջոցով: Ընդհանրապես, ոստիկանության գործողությունները մի շարք հարցեր են բարձրացրել հասարակության շրջանում, հատկապես ուշադրության է արժանացել այն տեսագրությունը, որում երեւում է՝ ինչպես է դիպուկահարը դիրքավորվում կրակոցն արձակելու համար: Կրակելու պահին փողոցում պառկած դիպուկահարը շրջապատված է բազմաթիվ քաղաքացիներ, որոնք հանգիստ կանգնած հետեւում են հանցագործի վնասազերծման ամբողջ ընթացքին: Այսօր ամբողջ օրը սոցիալական ցանցերը հեղեղված էին այս կադրերով ոգեշնչված մեմերով: 23-ամյա աղջիկը շարունակում է մնալ Վերակենդանացման բաժանմունքում, նրա վիճակը միջին ծանրության է:
Օդերեւութաբանները Հայաստանում տաք սեպտեմբեր են կանխատեսում։ Օդի ամսական միջին ջերմաստիճանը Երեւանում կլինի 21...23 աստիճան, ինչը 1-2 աստիճանով վերջին տարիների միջին ջերմաստիճանից։ Առանձին օրերին ցերեկը օդի տաքությունը կհասնի մինչեւ 37-39 աստիճանի։ Ամսական տեղումների քանակը նորմային մոտ կլինի։
Ռուսաստանում հայ գործարար է սպանվել։ Դեպքը տեղի է ունեցել Չելյաբինսկի մարզի Մագնիտոգորսկ քաղաքում։ 36-ամյա Կամո Հարությունյանին անհայտ անձը սպանել է իր տան մոտ՝ ատրճանակի տասը կրակոցով։ Նախնական տվյալով՝ կրակողը եւ հայ ձեռներեցը վեճ են ունեցել բիզնեսի շուրջ։
Ողբերգական վթար է տեղի ունեցել Երեւանում: Այս գիշեր «Infiniti» մակնիշի մեքենան Հաղթանակ կամրջի վրա դուրս է եկել երթեւեկելի գոտուց, տապալել կամրջի երկաթե հենասյուներն ու ճաղավանդակներն ու ընկել ձորը: Վթարի հետեւանքով երեք մարդ տեղափոխվել հիվանդանոց: Նրանցից մեկը մահացել է: Ավելի ուշ պարզվել է, որ մահացածը 18-ամյա Հայկ Մելքոնյանն է: Նա «Էրեբունի» ֆուտբոլային ակումբի խաղացող է:
Խորհրդային շրջանի հայ գործիչների անունները կրող երեւանյան փողոցները վերանվանելու վերաբերյալ Ավագանու «Ելք» խմբակցության առաջարկը քաղաքապետարանը պետք է դնի հանրային քննարկման: Այս մասին լրագրողներին ասել է Տարոն Մարգարյանը՝ միաժամանակ, նշելով, որ այս առաջարկը կարող է որոշ խնդիրներ առաջացնել, որովհետեւ նախկինում այդ փողոցները մեկ անգամ անվանափոխվել են, հետո կրկին վերանվանվել նույն գործիչներով: Չնայած հարցը պետք է դրվի ավագանու քննարկմանը, սակայն Տարոն Մարգարյանն արդեն որոշում ունի առնվազն մեկ փողոցի հարցում՝ Լենինգրադյան փողոցը չի անվանափոխվի: Նշենք, որ «Ելքն» առաջարկում է Լենինգրադյան փողոցն անվանակոչել Լեոնիդ Ազգալդյանի անունով, Ամիրյանը՝ Վռամշապուհ արքայի, Միկոյանը՝ Քըրք Քրքորյանի, Կասյանը՝ Վազգեն Առաջինի, իսկ Ֆրունզեինը՝ Ապրիլյան հերոսների:
ԱՄՆ դոլարի փոխարժեքը նվազել է, իսկ եվրոն կտրուկ վերելքից հետո էժանացել է ավելի քան 4,5 դրամով։ Դոլարի փոխարժեքը օգոստոսի 30-ին կազմել է 478, եվրոյիը՝ 571, ֆունտինը՝ 618, ռուբլունը՝ 8.16 դրամ։
Հանրապետության տարածքում օգոստոսի 31-ին սպասվում է առանց տեղումների եղանակ: Երեւանում սպասվում է առանց տեղումների եղանակ: Մայրաքաղաքում գիշերը կդիտվի +20+22, ցերեկը՝ +37+39 աստիճան տաքություն: