Ավան եւ Նոր Նորք վարչական շրջանների ընդհանուր իրավասության առաջին ատյանի դատարանում, այսօր՝ օգոստոսի 31-ին, «Սասնա ծռերի» 18 անդամների գործով դատական նիստը անցնում է լարված մթնոլորտում:
NEWS.am-ի թղթակիցը հաղորդում է, որ ողջ նիստի ընթացքում պաշտպանները եւ դատավոր Արտուշ Գաբրիելյանը բանավիճում են եւ չեն կարողանում բուն դատաքննության պրոցեսին անցնել:
Դատավորը ամբաստանյալներ Թորոս Թորոսյանի եւ Սերգեյ Կյուրեղյանի պաշտպանության համար հանրային պաշտպան ներգրավեց Լիանա Գասպարյանին:
Թորոս Թորոսյանը պնդեց, որ ինքը չի հրաժարվում իր պաշտպան Լիպարիտ Սիմոնյանից, պարզապես արգելում է իր բացակայության դեպքում ներկայանալ նիստերին:
Սերգեյ Կյուրեղյանը հրապարակավ հրաժարվեց հանրային պաշտպանի ծառայությունից:
Լիանա Գասպարյանն էլ դատարանին միջնորդություն ներկայացրեց՝ ամբաստանյալի ցանկությանը հակառակ հանրային պաշտպան ներգրավելու հետ կապված հարցով դիմել ՍԴ:
Նա առաջարկում է, որ ՍԴ-ն քննարկի ամբաստանյալի ցանկությանը հակառակ հանրային պաշտպան ներգրավելու հարցը, որովհետեւ դատարանը պարբերաբար ներգրավում է հանրային պաշտպան, ինչին դեմ են ամբաստանյալները: Դրա հետեւանքով դատական նիստերը վերածվում են հանրային պաշտպան ներգրավելու եւ դրանք մերժելու գործընթացի, ինչն անհնարին է դարձնում նորմալ դատաքննություն անցկացնելու հնարավորությունը:
Բանն այն է, որ Սահմանադրությունը սահմանում է, որ անձն իրավունք ունի իր ընտրած պաշտպանի միջոցով իրականացնել իր պաշտպանությունը, իսկ քրեական դատավարության օրենսգիրքը դատավորին իրավունք է վերապահում որոշ դեպքերում արդարադատության շահերից ելնելով չընդունել ամբաստանյալի պաշտպանից հրաժարումը: Քանի որ այս նորմը հակասում է Սահմանադրությանը, փաստաբանը միջնորդեց այդ հարցով դիմել ՍԴ:
