«Հյուսիս-Հարավ» հայկական մայրուղին ինչ-որ չափով կարող է մրցակցել իրանցի բեռնափոխադրողների համար ներկայիս տարանցիկ երթուղիների հետ: Այս մասին NEWS.am-ի հետ զրույցում ասաց Վրաստանի Միջազգային բեռնափոխադրողների ասոցիացիայի (GIRCA) գլխավոր քարտուղար Գիյա Ցիպուրիան:
Հայկական մայրուղին գուցե մի փոքր տանուլ տա հեռավորության իմաստով, բայց շահի ընթացակարգերի պարզությամբ: Իրանը բեռնատարների երթեւեկության քվոտաների հարցում չլուծված խնդիրներ ունի մեծ թվով հարեւան երկրների հետ: Իսկ Հայաստանի հետ Թեհրանը նման խնդիրներ չունի, նշեց Ցիպուրիան:
Թուրքիայով երթուղին (Իգդիր եւ Կարս) ավելի կարճ է, սակայն սահմանապահ ստուգումն ավելի շատ ժամանակ է պահանջում: Այսպես՝ Վրաստանում Թուրքիայի Սարփի հսկիչ անցակետում մեքենաները երբեմն կարող են օրերով կանգնել: Իհարկե, մի շարք դեպքերում տեղական իշխանությունները թուրքական կողմի հետ ինչ-որ բարելավումների հասել են: Սակայն Հայաստանում սահմանապահ ընթացակարգերն ավելի բարենպաստ են, նշեց Ցիպուրիան:
«Հյուսիս-Հարավ» 4 ուղեմասով մայրուղին կկրճատի Իրանից մինչեւ Վրաստանի սահման երթուղու ժամանակը, ինչպես նաեւ հեռավորությունը՝ ներկայիս 556-ից մինչեւ 495 կմ՝ մի շարք լեռնային հատվածների հարթեցման եւ նորերի՝ առավել ուղիղ հատվածների կառուցման հաշվին: Շինարարության ընդհանուր արժեքը նախկինում 960 մլն դոլար էր գնահատվում, հիմա՝ մոտ 1,5 մլրդ դոլար:
