ԵԱՀԿ Մինսկի խումբը պետք է ձեռնպահ մնա անատամ եւ անհասցե հայտարարություններից: Այս մասին, այսօր՝ սեպտեմբերի 4-ին, «Հակառակորդի ռազմաքաղաքական մարտավարությունն ու մեր անելիքները» թեմայով խորհրդաժողովին լրագրողների հետ զրույցում նշել է ՀՀ պաշտպանության նախարարի տեղակալ Արտակ Զաքարյանը՝ անդրադառնալով ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկի հայտարարությանը, ըսը որի իրենք անկարող էին իմանալ, թե որ կողմից է եղել Չինարիում կրակոցները:
Զաքարյանի խոսքով, Կասպրշիկի հայտարարությունը կասկածի տակ չի դնում ՀՀ պաշտպանության նախարարության հայտարարությունը, թե կրակոցներն ադրբեջանական կողմից են եղել. «Պարզ է, որ դիմացի հատվածից է կրակոց եղել»:
Հարցին, թե իր կարծիքով, ինչո՞ւ է Կասպրշիկը նման անհասցե հայտարարություն արել, պաշտպանության փոխնախարարը պատասխանեց. «Ես չգիտեմ, թե ինչու է հայտարարությունն անհասցե: Փաստը մնում է փաստ, որ նույնիսկ ԵԱՀԿ մոնիտորինգ իրականացնող խմբի վրա Ադրբեջանը կարող է կրակել»:
Նրա ներկայացմամբ, ՀՀ ՊՆ-ին մտահոգում է այն, որ Հայաստանի սահմանների վրա կրակում են, այդ թվում՝ նաեւ դիտորդական առաքելություն իրականացնողների վրա. «Ինձ հավասարապես անհանգստացնում է, որ կրակում են մեր մանկապարտեզների վրա, եւ հավասարապես էլ մտահոգում է, որ կրակում են ԵԱՀԿ դիտորդների վրա: Շատ ցանկալի կլինի, որ ԵԱՀԿ Մինսկի խումբը ձեռնպահ մնա անատամ եւ անհասցե հայտարարություններից, այդ ժամանակ արդեն կդադարեն կրակել»:
Ավելի վաղ NEWS.am-ը հայտնել էր, որ օգոստոսի 31-ին Չինարիում ԵԱՀԿ առաքելության դիտարկման ընթացքում Ադրբեջանը խախտել էր հրադադարի պահպանման ռեժիմըւ եւ կրակ բացել:
