Հայաստանը հրաժարվել է մասնակցել սեպտեմբերի 3-ին Վրաստանում մեկնարկած ՆԱՏՕ-ի զորավարժություններին: Պաշտպանության փոխնախարարն ասում է՝ Հայաստանը պաշտոնապես չի էլ հաստատել, որ մասնակցելու է Դաշինքի վարժանքներին: Ըստ Արտակ Զաքարյանի՝ ՆԱՏՕ-ն եղել է եւ կմնա Հայաստանի գործընկերը, իսկ Դաշինքի այս կամ այն միջոցառմանը չմասնակցելու մեջ արտառոց ոչինչ փնտրել ու հետեւանքներ սպասել պետք չէ: Զաքարյանը նաեւ հիշեցրել է, որ մենք ՀԱՊԿ-ի լիիրավ անդամ ենք, եւ մեր անվտանգության գլխավոր հովանոցը հենց այդ համակարգն է: Ավելի վաղ վարժանքներին մասնակցությունից հրաժարվել էր նաեւ Ադրբեջանը: Արդյունքում, Ախալցխայում մեկնարկած զորավարժություններին մասնակցում են Վրաստանը, ԱՄՆ-ն, Բուլղարիան, Ռումինիան, Ուկրաինան:
Ազգային ժողովում մշտական հանձնաժողովների նիստերն արդեն մեկնարկել են, իսկ մի շարք պատգամավորներ, կարծես, դեռ չեն վերադարձել արձակուրդից: Եվրոպական ինտեգրման հարցերի հանձնաժողովի նախագահը դժգոհ է հատկապես հանրապետական պատգամավորներ Արտակ Սարգսյանից («ՍԱՍ-ի Արտակ») եւ Արկադի Համբարձումյանից («Դերժավայի Արկադիկ»): Այսօրվա նիստի ժամանակ հանձնաժողովի նախագահ Նաիրա Զոհրաբյանը հայտարարել է, որ նրանք պատժվելու են՝ պարբերաբար եւ անհարգելի բացակայելու համար: Զոհրաբյանը պատրաստվում է համապատասխան գրություն ուղարկվել ԱԺ խոսնակին: Նշենք, որ նոր գումարման Ազգային ժողովի աշնանային նստաշրջանը մեկնարկելու է սեպտեմբերի 11-ին:
«Կոնտինենտալ» ռեստորանում ողբերգական ավարտով վիճաբանություն է տեղի ունեցել: Երեւան-Արտաշատ ճանապարհին գտնվող ռեստորանի հարակից տարածքում տեղի ունեցած դանակահարության հետեւանքով մահացել է 25-ամյա Ստեփան Մինասյանը: Մեր տեղեկություններով՝ վեճի են բռնվել ռեստորանում հարսանիքի երկու մասնակիցներ: Նրանցից մեկի որդին միջամտել է վիճաբանությանը՝ հորը պաշտպանելու նպատակով: Այդ ժամանակ էլ երիտասարդը դանակահարվել է, իսկ ավելի ուշ հիվանդանոց մահացել: Ըստ լուրերի՝ Ստեփանը վերջերս էր ամուսնացել, նրա կինը հղի է: Հիվանդանոց են տեղափոխվել նաեւ 45-ամյա Եղիշ Հայրապետյանն ու 21-ամյա Հարություն Մանուկյանը: Վերջինին կասկածում են Ստեփան Մինասյանին դանակահարելու մեջ: Նա ոստիկանության հսկողության ներքո էլ: Դեպքի առիթով քրեական գործ է հարուցվել:
Բյուրական գյուղին հարակից սարում հրդեհի նոր օջախ է հայտնաբերվել: ԱԻՆ-ի նախնական տվյալներով՝ շուրջ 20 հա բուսածածկ եւ անտառածածկ տարածք է այրվել: Հրդեհաշիջման աշխատանքներին մեծ թվով հրշեջներ, անտառտնտեսության եւ ոստիկանության աշխատակիցներ, գյուղի բնակիչներ են մասնակցում: Նշենք, որ առաջին հրդեհը Բյուրականի անտառում բռնկվել էր սեպտեմբերի 3-ին. այսօր առավոտյան այն մեկուսացվել էր: Բյուրականի գյուղապետը մեզ հետ զրույցում վստահեցրեց, որ կրակը բնակավայրերին եւ այգիներին չի սպառնում: Սա այս տարվա երրորդ խոշոր հրդեհն է. նախորդները մեծ վնաս են հասցրել Արտավանի անտառին եւ Խոսրովի արգելոցին:
Հյուսիսային Կորեան սեպտեմբերի 3-ին ջրածնային ռումբ է փորձարկել: Փորձագետների կարծիքով՝ սա Փհենյանի կողմից երբեւէ իրականացրած ամենահզոր միջուկային փորձարկումն է: Հարեւան երկրները հայտնել են ստորգետնյա երկու ուժեղ ցնցման, ենթադրաբար՝ արհեստական ծագման երկրաշարժի մասին: Հարավային Կորեան մեծ հեռահարության թեւավոր հրթիռների օգտագործմամբ մարտական հրաձգություն է ծրագրում՝ ի պատասխան Փհենյանի միջուկային փորձարկման: Իսկ ԱՄՆ նախագահ Դոնալդ Թրամփը չի բացառել Հյուսիսային Կորեայի վրա հարձակման հնարավորությունը եւ Փհենյանի գործողությունները թշնամական ու վտանգավոր է կոչել:
Սեպտեմբերի 4-ին դոլարն ու եվրոն էժանացել են: Դոլարի փոխարժեքը կազմել է 478 դրամ, եվրոյինը՝ 569, ռուբլունը՝ 8 դրամ 26 լումա, բրիտանական ֆունտինը՝ 619 դրամ:
Սեպտեմբերի 5-ին հանրապետությունում սպասվում է առանց տեղումների եղանակ: Օդի ջերմաստիճանը սեպտեմբերի 5-ին էապես չի փոխվի, իսկ 7-8-ին կնվազի 3-4 աստիճանով: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +19+21, ցերեկը՝ +35+37 աստիճան տաքություն: