«Սասնա ծռերի» ու Սեֆիլյանի գործերով փաստաբանների դեմ 30 վարույթ է հարուցվել, որոնցից մեկով արդեն որոշում է կայացվել: Այս մասին, այսօր՝ սեպտեմբերի 5-ին, լրագրողների հետ հանդիպման ժամանակ նշեց Զոհրաբյանը:
Նրա խոսքով, խոսքը փաստաբան Հայկ Ալումյանի կողմից դատարանի դահլիճը լքելուն էր վերաբերում. «Վարույթը կարճվել է, ոչ միայն կարճվել է, այլեւ խորհուրդը որոշել է դիմել Արդարադատության խորհրդին՝ դատավորի վարքագիծը քննարկելու համար: Այդ 30 գործերից մի քանիսի եզրակացություններին ծանոթ եմ, դրան հօգուտ փաստաբանի են: Մասնավորապես, նշվել է, որ դատավորը նշել է, որ փաստաբանի կարգավիճակ չունեք եւ ձայն չի տվել փաստաբանին, բայց հետո որպես փաստաբանի նրա նկատմամբ կիրառել է սանկցիա»,-ասաց Արա Զոհրաբյանը:
Նա անդրադարձավ նաեւ Ժիրայր Սեֆիլյանի պաշտպան Մուշեղ Շուշանյանին ՔԿՀ-ում խուզարկելու փորձին՝ նշելով. «Այն ժամանակ երբ ՔԿՀ-ն փորձել էր Ժիրայր Սեֆիլյանի փաշտպան Մուշեղ Շուշանյանին խուզարկելու փորձ կատարել, ես զանգեցի արդարադատության նախարարին, խնդրեցի հանդիպում կազմակերպել ՔԿՎ աշխատակիցների հետ: Հանդիպման ժամանակ ՔԿՎ-ն պնդում էր, որ կարող են փաստաբանին խուզարկել: Երբ մենք ասացինք, որ չեք կարող, որովհետեւ օրենքում գրված է, որ չի կարելի փաստաբանին խուզարկել իր մասնագիտական գործունեության ժամանակ, նրանք որպես հակափաստարկ նշում էին, որ այդ պահին նա դեռ իր պարտականությունների կատարման մեջ չէ: Նրանց տրամաբանությամբ, պետք է փաստաբանը հասներ իր վստահորդին, որ այդ իմունիտետը գործեր:
Ի վերջո, համաձայնության եկանք, որ փաստաբանին չի կարելի խուզարկել: Նաեւ համաձայնության եկանք, որ չի կարելի ուսումնասիրել փաստաբանի մոտ գտնվող փաստաթղթերը»:
