Արաբական Միացյալ Էմիրությունները շահագրգռված են ՀՀ գյուղատնտեսության ոլորտում ներդրումներ կատարելու հարցում։ Այս մասին NEWS.am-ի թղթակցի հետ զրույցում ասաց ՀՀ տնտեսական զարգացման եւ ներդրումների փոխնախարար Հովհաննես Ազիզյանը։
Նրա խոսքով՝ ԱՄԷ-ն Հայաստանի տնտեսության մեջ ընդհանուր առմամբ շուրջ 30 մլն դոլար է ներդրել (2016 թվականի վերջից՝ 28.4 մլն դոլար, 2017 թվականի սկզբից՝ եւս 1.2 մլն դոլար)։ «Ներդրումները հիմնականում գյուղատնտեսությանն են վերաբերում։ Այսպես՝ այդ միջոցներով արդեն նոր ինտենսիվ մրգատու այգիներ են պատրաստվում տնկել»,-հավելել է փոխնախարարը։
Նշենք, որ ԱԺ տնտեսական հարցերով հանձնաժողովի նիստում Հայաստան-ԱՄԷ նոր համաձայնագիրը հաստատվել է։ Այն միջազգային արբիտրաժային դատարաններում գործերի քննարկման դյուրացված տարբերակ է ենթադրում։